Bunaqasi kam uchraydi. Korxonaning salkam 1,5 mlrd. so‘mlik soliq qarzdorligi naqd pulda to‘lash hammagayam emas. Shuningdek, bunaqa ulkan qarzdorlikni tez fursatda undirishlishi Majburiy ijro byurosi (MIB) faoliyatida doim ham uchrayvermasa kerak. Ayniqsa, hozirgi karantin paytida.

MIB Toshkent shahar boshqarmasi matbuot xizmati rahbari Marg‘uba Amonovaga ko‘ra, Olmazor tumani Davlat soliq inspeksiyasiga «M.O.Qurilish» MChJdan soliqlardan hosil bo‘lgan qarzdorlikni undirishga oid ijro hujjati kelib tushgandi. Tumani DSI tomonidan Majburiy ijro byurosiga taqdim etgan ilova hujjatlaridan ko‘rinishicha, MChJ 2014 yildan bu yog‘iga soliqlarni o‘z vaqtida to‘lamagan, oqibatda qarzdorik yig‘ilib-yig‘ilib, 1 mlrd. 545 mln. 040 ming 818 so‘mni tashkil etgan.

Shuncha yillik qarzdorlikni MIB qancha vaqtda undirdi? Uch kunda! Tag‘in masofadan turib! To‘g‘ri tushuntirishga ko‘p narsa bog‘liq-da. MIB xodimlari korxona rahbariga bosiqlik bilan aytdiki, vaqt cho‘zishdan foyda yo‘q, faqat zarar bor, shu-uncha qarzdorlik tug‘adigan peniyaning o‘zi oyiga falon miqdorni tashkil qiladi, shu kerakmi sizga? Davlat baribir haqini undirmay qo‘ymaydi..

«M.O Qurilish» MChJ rahbari tushunishga moyil ekan-u shu paytgacha tuzukroq tushuntiradigan xodimga yo‘liqmagan chog‘i. Davlat ijrochisi bilan gaplashagach, bo‘ldi, gap yo‘q, to‘laganim bo‘lsin dedi-da, uch kunda jamiki qarzdorlikni naqd sanab qo‘yaqoldi...