«Йўл қоидаси — умр фойдаси». Зеро, йўл ҳаракати қоидаларига риоя этиш инсонни кўп хавф-хатардан асрайди. Автотранспорт ҳайдовчилари учун йўл белгилари беминнат ёрдамчи вазифасини ўтайди. Лекин дунё мамлакатларида шундай антиқа йўл белгилари ҳам борки, улар қандай маъно билдиришини ногаҳон англаш қийин», — деб ёзади «Миллий тикланиш» газетаси.

Австралияда «Эҳтиёт бўлинг, туялар!» ёки «Эҳтиёт бўлинг, бегемотлар, кенгурулар!» каби йўл белгилари бор. Миср ва Бирлашган Араб Амирликларида «Туяларга йўл беринг!», деган йўл белгисига дуч келасиз. Бундай йўл белгиларини ҳатто йирик шаҳарларнинг марказий кўчаларида ҳам учратиш мумкин.

Швецияда энг кўп тарқалган йўл белгиларидан бири — «Эҳтиёт бўлинг, типратиканлар!». Бу нафақат автомобил ҳайдовчиларини, балки велосипедда кетаётган одамларни ҳам огоҳлантиради. Чунки ҳар йили ҳайдовчиларнинг эътиборсизлиги сабаб мамлакатда кўплаб типратиканлар нобуд бўлади.

Буюк Британия, Чехия каби мамлакатларда қўлида шиша кўтариб олган, лекин ўзи эмаклаб кетаётган киши тасвири туширилган «Мастларга йўл беринг!» белгиси мавжуд.

Дунёнинг кўплаб мамлакатларида йўл белгиларига хабарлар ёзилган ҳолатга ҳам дуч келиш мумкин. Гарчи улар бир қадар ғайриодатий бўлса-да, ушбу давлатга келган хорижлик меҳмонларнинг кайфиятини кўтаришга хизмат қилади. Шу боис кўп саёҳатчилар бу мамлакатларга ана шундай йўл белгиларини кўриш учун ҳам келади. Масалан, айрим мамлакатларда қияликка кўтарилган йўлларнинг четидаги пастга қулаш мумкин бўлган жойларига «Учишни ўрган!» номли йўл белгиси ҳам қўйилган. Бу орқали ҳам мавжуд хавфга ишора қилинган, ҳам унинг антиқа ечими топилган.

Украинада сайёҳлар уларнинг ёнида суратга тушиши учун ўрнатилган йўл белгилари мавжуд. Бундай йўл белгисига «бу фалон шаҳарда ўрнатилган, унинг ёнида ҳамма суратга тушади», деб ёзиб қўйилган. Бундан кўриниб турибдики, туристларни жалб қилишнинг антиқа усули топилган.

Уммон давлатида қум бўронига дуч келиш мумкинлигидан огоҳлантирувчи йўл белгиси бор. АҚШда эса ёввойи ҳайвонларга йўлиқиш таҳдидидан огоҳлантирувчи йўл белгиларини учратиш мумкин. Булар энг аввало, табиатни асрашга қаратилгани билан аҳамиятлидир. АҚШ ҳамда Мексика чегарасида жойлашган транспорт йўлларида йўлни шошилиб кесиб ўтувчи мигрантлардан (улар чегарадан ноқонуний ўтаётгани учун тез юради ёки югуради) эҳтиёт бўлишни англатувчи йўл белгиси мавжуд.

Мексикада эса ҳукумат транспорт йўли бир текис эмаслигини ўзлари ҳам тан олган ҳолда, уни тузатишдан кўра бу ҳолатдан ҳайдовчиларни огоҳлантирувчи йўл белгиси ўрнатишни афзал кўрганига гувоҳ бўлиш мумкин. Австрияда трамвайлар светафорнинг қизил ва сариқ чироқларида ҳам ҳаракатланишни давом эттириши мумкинлигини англатадиган йўл белгиси бор. Бундан бехабар сайёҳ ҳатто ўз ҳаётини хавф остига ҳам қўйиши мумкин. Яна бир трамвайлар билан боғлиқ антиқа йўл белгиси Буюк Британия қироллигининг Ньюкасл шаҳрида ўрнатилган. Унда транспорт ҳайдовчилари эмас, пиёдалар огоҳлантирилган. Йўл белгисида «Электр симларига тегиш шу заҳотиёқ ўлимга сабаб бўлади, жарима 200 доллар» дейилган ёзув мавжуд.

Бундай мисолларни кўплаб келтириш мумкин. Биз учун антиқа кўринган йўл белгилари энг аввало, ўша мамлакатнинг табиати ва жамиятнинг ижтимоий ҳолатидан келиб чиқиб ўрнатилгани. Қолаверса, бу сайёҳлар эътиборини жалб қилишнинг ўзига хос усули саналади.