Yamanda husiy isyonchilar bilan to‘qnashuvlar ortidan Saudiya Arabistoni armiyasi yuqori shay holatga keltirildi, deb yozadi Bloomberg manbalarga tayanib.

Qayd etilishicha, o‘tgan haftada janubi-g‘arbiy Jazan viloyatida husiylar bilan jangda Saudiya Arabistonining to‘rt nafar askari halok bo‘lgan va armiya qirollik hududi ustida Isroil tomon otilgan raketani urib tushirgan.

Husiylar raketa uchirishi ortidan Saudiya Arabistoni armiyasining barcha tarmoqlarida yuqori ogohlantirish protokollari faollashtirildi.

Agentlik eslatishicha, shu yilning aprel oyida Ar-Riyod husiylar bilan dastlabki sulh tuzganidan beri Saudiya Arabistoni harbiy xizmatchilari birinchi marta o‘ldirilmoqda. Vaziyat avj olishdan oldin, sentyabr oyida Saudiya koalitsiyasida xizmat qilgan to‘rt nafar Bahrayn rasmiysi halok bo‘lganiga qaramay, tomonlar kelishuvga erishishga yaqin edi.

Yamanda 2011 yilda «arab bahori» paytida prezident Ali Abdulla Solih hokimiyatdan ag‘darilgan, oradan uch yil o‘tib mamlakatda fuqarolar urushi boshlangandi. Keyin husiylar (shia musulmonlari) mamlakat poytaxti Sana shahrini nazorat ostiga oldilar va keyingi yili hokimiyatni qo‘lga olganini e’lon qilishdi. Janubiy Yamandagi sunniy partiyalar husiylarning hokimiyatni egallashini tan olishmadi.

Sunniylarni 2015 yilda Yamanga bostirib kirishini uyushtirgan Saudiya Arabistoni qo‘llab-quvvatlaydi. Yaman husiylarini Yaqin Sharqdagi boshqa shia guruhlari qatori Eron ham qo‘llab-quvvatlaydi.