Navoiy viloyatining Konimex tumanida ilk marotaba O‘zbekiston Respublikasi Ichki ishlar vaziri o‘rinbosarining sayyor qabuli tashkil etildi. Sayyor qabulda 200 dan ortiq aholi  ishtirok etdi. Fuqarolar uchrashuv davomida tibbiy xizmatdan foydalanish, yo‘l qurilishi, suv chiqarish, bandlik hamda ichki ishlar organlariga taalluqli bo‘lgan boshqa bir qator masalalar bilan murojaat qilishdi.

«Mening otam 3 yildan buyon  to‘shakka mixlanib yotib  qolgandi. Sharoitimiz kelishmagani uchun u kishiga nogironlik aravachasi olib berolmaganmiz. Bundan oldin bir necha marta mutasaddi  tashkilotlarga nogironlik aravachasi so‘rab murojaat qilgan edim. Lekin mening so‘rovim e’tibordan chetda qolgani uchun otamni yelkalab tashqariga olib chiqardik,-deydi fuqaro Narzulla Boymurodov alam bilan. Bugun  yuqoridan kelgan vazir o‘rinbosarining  sayyor  qabuliga kelib murojaat qilgan kunimning o‘zidayoq uyimizga nogironlik aravachasi keltirib berildi». 

Taajjub, bu savob ishni tumandagi mutasaddilar  qilsa bo‘lmasmidi?  Agar vazir o‘rinbosari kelmaganida, bu muammo yana necha yil muammoligicha qolarmidi?

Shuningdek, sayyor qabul jarayonida yozib olingan murojaatlar asosida 6 nafar fuqaroga nogironlik aravachasi, 4 nafar imkoniyati cheklangan shaxslarga maxsus qo‘ltiqtayoqlar, 2 nafar fuqaroga eshitish apparati olib berildi. Shuningdek, 50 nafar murojaatchining tibbiy xizmat, ishsizlik, nafaqa olish, ishni qayta tiklash masalalari o‘z joyida ijobiy yechib berildi.