Чет тили (инглиз,немис, француз, рус) мактабларда кичик гуруҳларга бўлиб ўқитилади. Бу ўша тилни тез, самарали ўрганиш, нутқни тилга мослаштиришда қулай. Хорижий тилни ўрганаётган бола бегона тилда кўпроқ мулоқот қилиши, янги сўзларни ёдлаши, гап тузиши, грамматик ва лексик томонларини пухта ўзлаштириши учун ўн-ўн беш тенгдошининг орасида бўлгани маъқулроқ. Бу ўзини оқлаган, натижаси юқори тадбирлардан. Лекин анчадан бери бир саволга ечим тополмайман.

Хорижий тилларни ўқитиш учун қўллаётган усулимизни нега ўзбек тили ва адабиётини ўргатишда ишлата олмаймиз? Айтайлик, бирор асар муҳокамаси ёки она тилидаги бирор мавзуни 25–30 ўқувчига баравар тушунтириш мушкул. Айниқса, ўзбек тилининг ўзига хос қирралари, шевалар, тилшунослик бўлимлари, мақол, маталлар, нозик ифодаларни изоҳлаш, таҳлил этиш учун болаларнинг бари билан бирдек ишлаш машаққатли. Тил жозибасини болага юқтириш учун у билан алоҳида шуғулланиш, ёзган иншо, диктант, баёнини юзма-юз таҳлил этиб, хато-нуқсонларини батафсил кўрсатиш биргина муаллимга оғирлик қилади.

Адабиёт дарсларини кичик гуруҳларда ўтиш берилган мавзуни пухта ўзлаштириш, асарлар маъно-мағзини чуқурроқ англашга кўмаклашади. Энг муҳими, ўқитувчи ҳар бир бола билан индивидуал шуғулланишга, ўқувчининг муаммо-камчилиги нимада эканини тўлиқ кўрсатишга улгуради. Шеър айтишга ийманадиган, асар маъносини тушунишга қийналадиган, китоб ўқишга қизиқмайдиган бола бора-бора тенгдошларидан орт¬да қолмасликка, улар билан ҳамқадам кетишга одатланади. Асосийси, ўқувчиларда фикр ўсади, нутқи равонлашади, дўстини тинглашга, бошқанинг фикрини қадрлашга одатланади.

Муҳиба РАЖАБОВА,

Учтепа туманидаги 283-мактаб ўқитувчиси