Хабарлар тезкор Телеграм каналимизда Обуна бўлиш ×

Тошкент шаҳар тез тиббий ёрдам станцияси мобиллашди (видео)

Ахборот технологиялари ва коммуникацияларини ривожлантириш вазирлиги Соғлиқни сақлаш вазирлиги билан биргаликда «Тошкент шаҳрида тез тиббий ёрдам хизмати фаолиятига замонавий ахборот-коммуникация технологияларини жорий этиш» лойиҳаси биринчи босқичини ишга туширди.

Айни вақтда амалга оширилган ишлар қиймати қарийб 12 миллион долларни ташкил этмоқда. Ҳозирда Хитой компанияси томонидан замонавий АКТ ва тиббий асбоб-ускуналар билан жиҳозланган 81 дона тез тиббий ёрдам автомобиллари реанимобиль етказиб берилди. Жорий йил якунига қадар эса қолган барча 69 дона тез тиббий ёрдам автомобиллари етказиб берилиши режалаштирилган.

Ушбу харид қилинган тез тиббий ёрдам автомобиллари мавжуд автомобиллардан афзаллиги шундаки, уларнинг салон қисмига замонавий видеокузатув камераси ва зарур тиббий ахборот коммуникация ва мультимедиа технологиялари ўрнатилганлиги ва бу эса, ўз навбатида, Call-марказ билан доимий алоқада бўлиш, аҳволи оғир беморларга масофадан туриб зарур маслаҳат ва кўрсатмалар бериш, энг муҳими, беморнинг ҳар бир дақиқасини тўлиқ назоратда бўлишини таъминлайди. Ҳозирги кунда Тошкент шаҳар тез тиббий ёрдам станциясининг Call-марказида жорий таъмирлаш ишлари якунига етказилиб, замонавий АКТ ускуналари ўрнатилди. Шунингдек, автоматлаштирилган тез тиббий ёрдам хизмати бошқарув тизими синов тарзида жорий этилиб, ҳозирда мазкур тизимдан фойдаланадиган ходимларни ўқитиш ишлари олиб борилмоқда.

Ушбу замонавий технологияларни тизимга жорий этиш билан боғлиқ йирик лойиҳанинг иккинчи босқичида «Huawei» компанияси билан биргаликда республиканинг барча ҳудудларидаги тез тиббий ёрдам хизматига замонавий ахборот-коммуникация технологияларини жорий этиш кўзда тутилган. 155,0 млн. долларга тенг лойиҳага кўра, республиканинг барча ҳудудларида тез тиббий ёрдам хизмати Call-марказлари замонавий ахборот-коммуникация технологиялари билан жиҳозланади ва мавжуд тез тиббий ёрдам транспорти автопаркини тўлиқ янгилаш режалаштирилган.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг