Ҳиндистонлик олимлар коронавируснинг 10 та типостини аниқлашди. Улардан бири доминант бўлиб чиқди. Бу ҳақда «India Times» нашри хабар берди.

Тадқиқотни Биотиббий геномика миллий институтидан Нидхан Бисвас ва Партха Мажумдер олиб боришган. Олимлар SARS-CoV-2 нинг турли 10 та типостини аниқлашди. Улар тахминан тўрт ой давомида оналик О вирусидан мутация йўли билан ҳосил бўлган. О типини мутахассислар Хитойнинг Ухань шаҳрида тарқалган коронавируснинг асосий тури эканлигини айтишмоқда.

Жами 10 та типостидан А2а типи энг кучли бўлиб чиқди. Вирус одамнинг ўпкасига кўп миқдорда кириб, беморга касаллик юқтиради ва инфекциянинг тарқалишига олиб келади. Олимларнинг айтишича, COVID-19 сайёранинг барча қитъаларига жуда тез тарқалишига айнан шу сабаб бўлган.

Тадқиқотчилар оммабоп GISAID кутубхонаси таҳлилларига таяниб вируснинг доминант типостини аниқлашга муваффақ бўлишди. Унинг таркибида 2019 йил декабрдан 2020 йил апрелгача 55 та мамлакатда тўпланган 3600 коронавируснинг РНК кетма-кетлиги мавжуд.

Олимлар А2а вирус зарралари беморнинг томоғи орқали ўпкага тушишини аниқлашди. Мутация туфайли вирус ўпка ҳужайралари билан алоқа қилиш учун зарур бўлган оқсилнинг асосий таркибий қисмини ўзгартирди. Бу унинг бемор организмида тезда жойлашиб олишига имкон беради. Ҳиндистонда касалланган одамлардан олинган намуналарнинг 47,5 фоизида айнан А2а топилган: уларнинг аксарият қисми мамлакатдан четга чиқишмаган.

Журналистларнинг таъкидлашича, олимлар бор-йўғи 35 та намунага асосланишган. Бу жуда кам. Бироқ нима бўлганда ҳам тадқиқот коронавируснинг тарқалиш йўлини, касалланганларнинг этник таркибидан вирусни юқтириш эҳтимолини тушунишга ҳамда COVID-19 га қарши вакцина ишлаб чиқишга ёрдам беради.