Лондон фонд биржасида листингга киритилган ва халқаро капитал бозорларида сотувга чиқарилган «Ўзсаноатқурилишбанк» АТБнинг 300 миллион АҚШ доллари миқдоридаги халқаро облигациялари инвесторлар томонидан юқори баҳоланди.

Мамлакатимизда барқарор иқтисодий ўсишни таъминлаш ҳамда хусусий, шу жумладан хорижий инвестицияларни, республикадаги лойиҳаларга кенг жалб қилиш учун халқаро капитал бозорлари муҳим рол ўйнайди. Бу борада жорий йил февраль ойида мамлакатимиз тарихида илк бора Ўзбекистон Республикасининг 1 миллиард АҚШ долларига тенг суверен облигацияларининг халқаро капитал бозорларида муваффақиятли жойлаштирилиши юртимиздаги тижорат банклари ва корхоналар учун янги имконият яратди.

«Ўзсаноатқурилишбанк» АТБ томонидан корпоратив халқаро облигациялар чиқариш бўйича JP Morgan, Citigroup, Commerzbank, Raiffeisen Bank сингари халқаро инвестиция банклари (молиявий консультантлар) тавсиялари асосида тайёргарлик ишлари амалга оширилди. Жорий йилнинг 18-22 ноябрь кунлари Цюрих, Франкфурт ва Лондон шаҳарларида 60га яқин инвесторлар билан учрашувлар ва музокаралар бўлиб ўтди.

Бўлиб ўтган музокараларда инвесторларга республикада, жумладан банк соҳасида олиб борилаётган ислоҳотлар, ЎзР Тикланиш ва Тараққиёт жамғармаси томонидан йирик тижорат банкларининг капитализацияси ва кредитларни мазкур жамғармага ўтказиш борасидаги Ҳукумат стратегияси, Ўзбекистондаги банкларни хусусийлаштириш истиқболлари, халқаро облигация маблағларининг қайси лойиҳаларга йўналтирилиши, банкнинг бошқа ресурс базасини шакллантириш манбалари, трансформациядан кейин кутилаётган активлар ҳолати, кредит сиёсати, муаммоли активлар динамикаси тўғрисида маълумотлар тақдим этилди.

Шу ўринда таъкидлаш жоизки, йирик инвесторлар томонидан банкнинг трансформация жараёни (жумладан, хусусийлаштиришга тайёргарлик) ва унда Халқаро молия корпорациясининг иштироки ҳамда корпоратив бошқарув тизимининг такомиллаштирилиши ижобий ҳолатлар сифатида эътироф этилди.

Банкнинг бизнес модели тижорат фаолиятини янада мустаҳкамлашга ва босқичма-босқич хусусийлаштиришга қаратилаётгани туфайли, «Ўзсаноатқурилишбанк» АТБ инвесторлар томонидан давлат банки эмас тижорат банки сифатида қабул қилинди ҳамда Россиянинг «Московский кредитный банк» (5 йиллик 5,3%), Грузиянинг «TBC Bank» (5 йиллик 5,75% купон), Туркиянинг «Akbank» (5 йиллик 6%) каби банкларига таққосланди.

Жорий йилнинг 25 ноябрь куни инвесторларнинг таклифларига асосланган молиявий консультантларнинг тавсиясига кўра банкнинг 5 йиллик халқаро облигациялари учун илк даромадлилик ставкаси 6,50% этиб белгиланди ва Лондон вақти билан соат 08:23да транзакция эълон қилинди. Буюртмалар ҳажми соат 10:00да 300 млн. доллар (транзакция тўлиқ қопланди) ва 12:10да 800млн. долларни (транзакция 2,5 баробар тўлиқ қопланди) ташкил этди.

Соат 12:25да облигацияларнинг даромадлилик ставкаси 0.125%га пасайтирилди ва янги ставка 6,375% эълон қилинди. Мазкур стратегия инвесторларга маъқул келди ва 13:05га келиб буюртмалар ҳажми 1 млрд. доллардан ошди. Соат 14:00да буюртмалар китоби 1,2 млрд. доллар билан, яъни транзакцияни 4 баробардан юқори қоплаган ҳолда ёпилди.

Ушбу юқори даражадаги талаб туфайли молиявий консультантлар даромадлилик ставкасини 6%га туширишга муваффақ бўлишди. Транзакция Лондон вақти билан соат 17:00да 5,75% купон ставкаси билан якунланди.

Мазкур транзакция Ўзбекистон Республикасидаги ислоҳотларнинг, айниқса банк тизими ислоҳотларининг халқаро инвесторлар томонидан ижобий қабул қилинганидан далолат беради. Қолаверса, Ўзбекистон тарихида илк бора «Ўзсаноатқурилишбанк» АТБ томонидан чиқарилган корпоратив халқаро облигациялар бошқа тижорат банклари ва корхоналар учун «бенчмарк» бўлиб хизмат қилади.