Angliyalik erkak ikki yil davomida kuniga ikki litr energetik ichimliklar ichib, reanimatsiyaga tushdi, deb yozadi LADBible.

Endi Hammond, o‘z so‘zi bilan aytganda, o‘smirlik chog‘idan energetik ichimliklarga qaram bo‘lib, kuniga kamida bir banka ichar edi.

«Men ularni 15 yoshimdan beri ichaman. Aslida ta’mi menga yoqmaydi. Aksincha, bu odatga aylanib qolgandi», — deydi 36 yoshli erkak.

Hammondning odati so‘nggi ikki yil davomida har kuni bu ichimlikdan 2 litr ichishiga olib keldi. Natijada, Endining to‘satdan tobi qochdi va reanimatsiyaga tushdi, u yerda shifokorlar uning buyragida tosh va infeksiyani aniqladilar. O‘z vaqtida ko‘rsatilgan yordam tufayli bemorning ahvoli barqarorlashdi.

«Mening ikkita farzandim bor va buyrak infeksiyasi sepsisga aylanishi mumkinligini bilaman. Bu juda yomon tugashi mumkin edi, lekin omadli bo‘lganimdan minnatdorman», — deya tan oladi u.

O‘z tajribasidan so‘ng Hammond energetik ichimliklardan voz kechdi va faqat suv bilan va sog‘lom taomlarni iste’mol qilishga harakat qilmoqda.