O‘zbek xokkey klubi 2022 yilga qadar Kontinental xokkey ligasida ishtirok etishi mumkinligi haqida xabar bergan edik. O‘zbekiston xokkey federatsiyasi birinchi vitse-prezidenti Baxodir G‘ofurovning ma’lumot berishicha, buning uchun alohida klub tashkil etiladi va unda Rossiya, Finlyandiya va Shvetsiyadan chaqiriladigan legionerlar o‘ynashi rejalashtirilgan.

— Yangi klub bizga O‘zbekiston milliy jamoasi uchun o‘yinchilar yetishtirib chiqarish imkonini beradi. Bu asosiy vazifamiz.

Yangi jamoani esa legionerlar bilan to‘ldiramiz. Xorijlik o‘yinchilar Rossiyadan va uzoq xorij — Finlyandiya va Shvetsiyadan chaqiriladi. Shu bilan birga o‘zimizdan ham bir necha yigitlar jamoa safiga qo‘shiladi. Hozir esa endi seleksiya ishlarini boshlamoqdamiz, — deydi G‘ofurov.

Hozircha yangi klubning nomi qanday bo‘lishi ma’lum emas. Eslatib o‘tamiz, Kontinental xokkey ligasida Rossiyadan 19 ta hamda Belarus, Qozog‘iston, Latviya, Slovakiya, Finlyandiya va Xitoydan bittadan klub ishtirok etadi.