Qarshi shahrida joylashgan «Vatanparvarlar bog‘i»da Janubi-g‘arbiy maxsus harbiy okrugi, Qashqadaryo viloyati hokimligi, Ichki ishlar va Favqulodda vaziyatlar vazirliklari, viloyat Yoshlar ittifoqi hamda Ma’naviyat va ma’rifat markazi mas’ul xodimlari ishtirokida matbuot anjumani o‘tkazildi. Bu haqda Mudofaa vazirligi matbuot xizmati xabar berdi. 

Unda mingdan ortiq o‘quvchi-yoshlar, viloyat faollari va mahalliy aholi vakillari ham qatnashib, bog‘ hududida kelgusida bajarilishi ko‘zda tutilgan keng ko‘lamli ishlar haqida batafsil ma’lumot berildi.

«Bog‘dagi muzeyni boyitish uchun maxsus ishchi guruhi tuzilgan bo‘lib, ular Janubiy Koreyaning yetakchi va boy tajribaga ega bo‘lgan muzeylaridan tajriba olib keldi. Eng so‘nggi innovatsion texnologiyalar asosida bog‘ va muzey zamonaviy ko‘rinish kasb etadi. Kelgusida Amir Temur g‘ori maketini ham yasash niyatimiz bor. Bu borada ham ishga kirishilgan. Shuningdek, Amir Temur va Ilyosxo‘ja o‘rtasida bo‘lib o‘tgan «Loy jangi» sahnasi ham bog‘da aks ettiriladi», — deydi Qashqadaryo viloyat hokimi Zafar Ro‘ziyev.

Qariyb 7 gektar hududni egallagan «Vatanparvarlar bog‘i»da 2018—2019 yillarda 29,3 milliard so‘mlik rekonstruksiya ishlarini amalga oshirish mo‘ljallangan.

«Vatanparvarlar bog‘i»ning faoliyatini samarali yo‘lga qo‘yish bo‘yicha amalga oshiriladigan ishlarning «Yo‘l xaritasi»ga muvofiq joriy yilning mart oyiga qadar bog‘ hududiga bepul «Wi-Fi» o‘rnatilishi hamda kutubxonalar bunyod etilishi rejalashtirilgan.