Тошкент шаҳридаги ИНҲА университети мамлакатимиздаги қатор Меҳрибонлик уйлари билан яқиндан ҳамкорликни йўлга қўйиб, 2020-2021 ўқув йили давомида уларда тарбияланаётган болалар учун математика, физика, дастурлаш ва инглиз тили фанларидан бепул курсларни тақдим этди. Интерфаол ва замонавий педагогик технологиялар асосида амалга оширилган онлайн ўқув машғулотлари ёшларда нафақат чуқур билим олиш балки уларда ўзларининг аниқ соҳаларга бўлган қизиқишларини аниқлашларига имкон берди.

Мана шундай курсларда таҳсил олган Тошкент вилояти Чирчиқ шаҳридаги Меҳрибонлик уйи тарбияланувчиси ва 11-синф ўқувчиси Роберт Албертович Насировнинг қалбида компьютер технологияларига бўлган қизиқиш пайдо бўлиб, у дастурий инжиниринг мутахассислиги бўйича етук мутахассис бўлишга қарор қилди. У Тошкент шаҳридаги ИНҲА университети талабалари томонидан тақдим этилган курсларни катта қизиқиш билан ўрганиб, ўз устида қаттиқ ишлади. Университет талабалари ва юксак мақсадга ишонч билан интилган Робертнинг биргаликдаги саъй-ҳаракатлари рўёбга чиқиб, у дунёнинг энг нуфузли 100 та олийгоҳлари рўйхатига кирадиган Хитой давлатининг Changsha university of science and technology олийгоҳи талабасига айланди.

Тошкент шаҳридаги ИНҲА университетининг Меҳрибонлик уйлари билан ҳамкорлигининг ёрқин меваси сифатида баҳоланган Робертнинг ютуғи муҳтарам Президентимиз Ш.Мирзиёев томонидан шу йилнинг 28 июль куни бўлиб ўтган видеоселекторда алоҳида қайд этилиб, университет тажрибаси мамлакатимиз олий ўқув юртлари ўртасида кенг қўлланилиши зарурлиги таъкидланди.

Тошкент шаҳридаги ИНҲА университети раҳбарияти ва жамоаси бошланган ишларни давом эттиришга тайёр ҳолда, бўлажак етук мутахассис Робертни эришган улкан ютуғи билан самимий табриклайди ва унинг дунёдаги нуфузли университетлардан бири бўлган олийгоҳни муваффақиятли тугатишига ишонч билдиради.