«Sky Sports» нашри хабар беришича, Лондоннинг «Челси» клуби ҳужумкор ярим ҳимоячиси Эден Азар жамоа раҳбариятининг янги шартнома бўйича таклифини рад этган. Бу ўз-ўзидан футболчи жамоадан кетмоқчи эканига яна бир бор ишорадир.

Азар Мадриднинг «Реал» клубида ўйнаш катта шараф эканини ҳеч қачон яширмаган. Демак, «Челси» таклифининг рад этилиши Мадрид сари қўйилган катта қадам эканининг эҳтимоли катта.

Ўз навбатида «Реал» ҳам футболчига жиддий қизиқаётгани сир эмас. Яқинда Лондон суперклуби футболчини 112 миллион евро эвазига қўйиб юбориши мумкинлиги ҳақида хабар тарқалганди. Бу маблағ, футбол бозорининг шу кунлардаги нарх-навоси нуқтаи назаридан, Азардай футболчи учун кам. Бироқ унинг амалдаги шартномаси тугашига бир йил қолгани эътиборга олинса, кўпдай кўринади. «Реал» президенти Флорентино Перес эса анойи эмас: шунча пул тўлаш ўрнига жиндек сабр қилади ва... футболчини ё текинга ёки жудаям арзонга қўлга киритиши мумкин. Чунки у сабрнинг таги сап-сариқ олтинлигини жуда яхши билади.