Нуфузли Goal нашри футбол тарихидаги энг ёмон трансферларни эълон қилди.

Фелипе Коутиньонинг 2018 йил январида «Ливерпул»дан «Барселона»га 120 млн евро + 40 млн евро бонус эвазига ўтиши «энг муваффақиятсиз трансфер», деб топилди.

Коутиньо каталон клуби асосий таркибига кира олмади, ярим йилдан сўнг «Бавария»га ижарага бериб юборилди. Бироқ мюнхенликлар ҳамкорлик якунида бу футболчига эгалик ҳуқуқини сотиб олишдан бош тортишди.

«Барселона»га қайтган бразилиялик футболчи яна захирада ўтириб қолди, қолаверса, бот-бот жароҳат олиши ҳам майдонга тушишига халақит берди.

2022 йил январида «Барселона» Коутиньони ижара ҳуқуқи асосида «Астон Вилла»га жўнатди, ўша йилнинг май ойида инглиз жамоаси уни тўлиқ сотиб олиб, «Барселона»ни «бошоғриқ»дан қутқарди.

Goal тузган энг ёмон трансферлар рўйхати етакчи бешлигига, Коутиньодан ташқари, «Барселона»нинг яна икки футболчиси киритилди:

• Биринчи ўрин: Фелипе Коутиньо (2018 йилда «Ливерпул»дан «Барселона»га ўтган — трансфер қиймати 120 млн евро + 40 млн евро бонус);
• Иккинчи ўрин: Антуан Гризманн (2019 йилда «Атлетико»дан «Барселона»га ўтган — 120 млн евро);
• Учинчи ўрин: Жоау Фелиш (2019 йилда «Бенфика»дан «Атлетико» Мадридга ўтган — 126 млн евро);
• Тўртинчи ўрин: Усмон Дембеле (2017 йилда «Боруссия» Дортмунддан «Барселона»га ўтган — 105 млн евро);
• Бешинчи ўрин: Пол Погба (2016 йилда «Ювентус»дан «Манчестер Юнайтед»га ўтган — 89,5 млн фунт стерлинг).