Қашқадарё вилояти ҳокими Зафар Рўзиев журналистлар билан учрашди ва узр сўради.

«Эски Яккабоғдаги ҳолатда вилоят ҳокимлиги, туман ҳокимлиги айбдор. Мен шу айбимиз учун Давлатимиздан, ҳукуматимиздан, азиз халқимиздан, ҳурматли журналистларимиздан, ҳурматли блогерларимиздан, мана шу воқеаларда азият чеккан тадбиркорлардан таъзим қилиб, кечирим сўрайман», — дейди Зафар Рўзиев.

Эслатиб ўтамиз, Яккабоғдаги тадбиркорнинг биносини бузишга бўлган уриниш орқасидан келиб чиққан можаро анча муҳокама қилинган эди. Ўшанда тадбиркор бузиш учун булдозер бошқарувига ўтирган Яккабоғ тумани ҳоким ўринбосарини ёқиб юборган эди.

Ўзбекистон Президенти Шавкат Мирзиёев воқеа юзасидан танқидий фикр билдирган ва Зафар Рўзиевни халқдан, блогерлардан кечирим сўрашини талаб қилганди.

«Қашқадарёнинг валломати бор, Рўзиев деган, 5 йил қишлоқ хўжалиги вазири бўлиб ишлаган ноинсоф. ДХХ раҳбари борганидан сўнг чиққан изоҳларни ўқи. Битта жиннинг менинг сиёсатимни бутун дунёга шарманда қилди. Ўзимни туманим, у қиламан, бу қиламан, дейсан. Битта тузукроқ кадринг йўқ, яна Деҳқонободга тирмашасан. Ўзбекистондаги ҳозирги ошкоралик, шаффофликни таъминлаш учун кечаю-кундуз юритаётган сиёсатимга атрофингдагилар билан қилган «дўстлигинг».

Қўлингдан келмас экан, нима қиласан бир одамнинг туппа-тузук турган уйини бузиб? Сен хулоса қил, уйингни биров келиб бузса?

Ноинсофлар, мен сизларнинг қай бирингга бузгин, деб топшириқ бердим? Мен сизларга аввало одамларни рози қилиб, кейин жаноб Зокиров деган вазир билан ўтириб, лойиҳа қилиб, бош вазирга ҳисобот бериб, кейин қилинглар, деб топшириқ берганман.

Мана, сенинг «дўстлигинг», жаноб Рўзиев! Ўзингни ўша туманга ҳоким қилиб юбораман, айтиб қўяй!» — деган эди Президент.

Ушбу талаб юзасидан Қашқадарё вилоят ҳокими кечирим сўради. Эслатиб ўтамиз, бироз вақт муқаддам Фарғона вилояти ҳокими Шуҳрат Ғаниев ҳам кечирим сўраган эди.