Фарғонанинг Бувайда тумани Бештерак қишлоғида яшайдиган Мардонбек Муродов ёшгина йигит. Аммо шунга қарамай, ўзига ишончи баланд. Таваккалчиликдан чўчимайди. Гулчилик билан шуғулланаётганига 10 йил бўлди.

«Тадбиркорлик учун менга еримиз камлик қила бошлади. Шунинг учун уй қуришни бошлаганимиздаёқ томнинг устида ҳам иссиқхона ташкил қилиш режасини тузиб қўйгандим», — дейди Муродбек биз билан суҳбатда. — «Ва англадимки, қаловини топиб қорни ҳам ёндириш мумкин экан. Мана шу гулчиликнинг орқасидан машина олдик, уй қурдик».

Гулчининг айтишича, соф даромади йилига 30-40 миллион сўмни ташкил қилар экан. Унинг гуллари эрта баҳордан токи мустақиллик байрами арафасигача ҳам харидоргир бўлади.

«Гулчилик орқасидан шахсан президентимизнинг қўлидан «Келажак бунёдкори» нишонини оламан, деб сира ўйламагандим, аммо энди янада яхшироқ ишлаш, ўз устимда изланиш, кўпроқ ишчи ўрин яратишни ўйлашим кераклигини англаб етдим», — дейди Мардонбек келгуси режалари билан ўртоқлашаркан.

Гулчилик бошқалар назарида фақат баҳордан токи ёзгача қаттиқ меҳнат қилиш керак бўлган жараёндек туюлади. Аммо ундай эмас. Тадбиркорнинг таъкидлашича, эрта баҳордан ободонлаштириш учун гул етказиб бериш керак. Шу боис январ ойидаёқ уруғ сепиш февралнинг охирида эса ҳар бир униб чиққан миттигина икки қулоқли гулчаларни авайлаб тувакчаларга олиш каби юмушлар жуда кўп куч талаб қилади. Табиийки, Мардонбек бу пайтда ишчи ёллайди.

Томда гул етиштиришнинг қулай томони нимада, деб Мардонбекдан сўраганимизда, у ердаги иссиқхонада гуллар беш-олти соат қуёш нурларидан баҳраманд бўлса, томда тўққиз-ўн соат қуёш ўз нурларини аямайди. Мана шу ёруғлик ва иссиқлик эса гулларнинг жону дили, деб жавоб берди.

Келгусида гулларнинг турини кўпайтириш ва ҳатто хорижга экспорт қилиш Мардонбекнинг олдига қўйган мақсадларидан бири. Бунинг учун эса унда ўзига бўлган ишонч ва салоҳият етарли.