Наманган вилоятида мавжуд барча аттракционларни навбатдан ташқари техник кўрикдан ўтказиш бўйича кўрсатма берилган. Бу ҳақда вилоят ҳокимлиги матбуот хизмати хабар берди.

Наманган ҳокимлиги 30 сентябрь куни Наманган шаҳридаги “Афсоналар водийси” боғида қурилиши тўлиқ битказилмаган “Spin block” аттракционига синовдан ўтказилаётган вақтда бахтсиз ҳодиса туфайли ҳаётдан кўз юмган 18 ёшли қиз оиласига ва яқинларига чуқур ҳамдардлик ҳам билдирган.

Ҳокимият баёнотида иш жойларида техника хавфсизлигини таъминлаш борасида вилоятда олиб борилаётган ишларни кучайтириш кераклигига урғу берилган.

Вилоят ҳокимлиги вилоят прокуратураси билан ҳамкорликда содир бўлган ҳолатни ўрганмоқда.

30 сентябрь куни соат 15:40ларда Наманган шаҳридаги кўнгилочар истироҳат боғида қутқарувчи вазифасида ишлаган қиз боғда жойлашган, қурилиши тўлиқ битказилмаган «Spin block» аттракционига синов ўтказмоқчи бўлган.

Шу вақтда у аттракционга рухсатсиз чиқиб, эҳтиётсизлиги оқибатида темир трубага урилиб, воқеа жойида вафот этган.

Терговга қадар текширувда бу қиз (2001 йилда туғилган) «Наманган Истиқлол боғи» МЧЖга қарашли кўнгилочар боғда август ойидан бери қутқарувчи вазифасида ишлаб келгани ва унинг асосий иш жойи боғда жойлашган «аквапарк» сув ҳавзасида бўлгани аниқланган.