Украина президентлигига номзод Владимир Зеленский «Батькившина» партияси етакчиси Юлия Тимошенко билан келишиб олгани ҳақида хабарлар пайдо бўлган эди. Аммо Зеленскийнинг штаби бу хабарни рад этди.

Украина матбуотида Зеленский президент бўлган тақдирда Юлия Тимошенко бош вазир этиб тайинланиши ҳақида маълумотлар берилган эди. Унга кўра Тимошенко сайловнинг иккинчи қисмида Зеленскийни қўллаши ва бунинг эвазига парламентда коалиция тузиб, бош вазирлик ўрнини эгаллаши айтилганди. Аммо бу хабарлар Зеленский штаби томонидан қатъий инкор этилди. Ҳозирча Тимошенконинг штаби ҳеч қандай баёнот бермаган.

Эслатиб ўтамиз, Украина президентлиги учун сайлов 31 мартда бўлиб ўтган эди. Унинг якунларига кўра Владимир Зеленский 30,35 фоиз овоз тўплаган. Амалдаги президент Петр Порошенко учун эса 16,02 фоиз овоз берилди ва бу икки номзод сайловнинг иккинчи турида ўзаро кураш олиб боради.

Сайловнинг иккинчи тури 21 апрелда ўтказилиши режалаштирилмоқда.