Ҳиндистоннинг Ченнаи (собиқ Мадрас) шаҳрида 9 миллион одам истиқомат қилади. Ҳозир бу ерда ўткир сув тақчиллиги кузатилмоқда. Мегаполисдаги ҳаёт деярли тўхтаб қолган: кўплаб бюджет ташкилотлари, кафелар, ресторанлар ва меҳмонхоналар ёпилмоқда.

Шаҳар ҳокимияти сув таъминотини 40 фоизга камайтирган. Бутун шаҳар бўйлаб кондиционерлар ўчирилган, касалхоналар эса беморларни қабул қилишга улгурмаяпти. Кўплаб компаниялар ходимларни уйга жўнатиб юборди.

IT соҳасида фаолият олиб борадиган маҳаллий мутахассислар ассоциацияси раҳбари Винот Калигайнинг BBC нашрига маълум қилишича, компьютер фирмалари ходимлари имкон қадар уйда туриб ишламоқда. Аммо бу ҳолат вазиятни ўнглаш учун етарли эмас.

«Ахир уйда ҳам вақти келиб сув тугайди. Ўшанда биз нима қиламиз?» — дейди Калигай.

Ҳиндистонда аномал жазирама май ойининг ўрталарида бошланган эди. Қурғоқчилик натижасида бир неча ўнлаб одамлар қурбон бўлди. 10 июнда мамлакат пойтахти Нью-Деҳли шаҳрида иссиқ кўрсаткичи сояда 48 даража бўлди. Бу рекорд демакдир. Ҳиндистоннинг шимоли-ғарбидаги Чуру шаҳрида эса термометр 50 даражага қадар кўтарилди.

Глобал иқлим ўзгариши туфайли йил ўтгани сари ёғингарчилик тобора камроқ ва қисқа муддатли бўлиб бормоқда. Ичимлик суви етишмовчилиги эса шунингдек яна Москва, Пекин, Истанбул, Лондон ва Токиога ҳам хавф солмоқда. Ўтган йили тарихда биринчи марта замонамизнинг йирик шаҳрида сув тугаб қолди — Жанубий Африка Республикасининг Кейптаун шаҳрида муаммолар юзага келган эди.