Туркия ва АҚШ олимлари метеорит тушиши оқибатида инсон ўлими ҳақида илк далилларни топишди. Тадқиқотчиларнинг мақоласи «Meteoritics & Planetary Science» журналида чоп этилди.

Туркия Республикаси президенти ҳузуридаги давлат архивлари бош бошқармасида топилган ҳужжатга кўра, воқеа 1888 йил 22 августда содир бўлган. Маҳаллий вақт билан соат 20:30 да Ер атмосферасига оловли шар кўринишида кирган метеорит Сулаймония (Ироқ)да бир кишини ўлдириб, яна бир кишини фалаж қилиб қўйган. Усмонлилар тилида ёзилган матнда қишлоққа тошли «ёмғир» ёғилгани, экинларни пайҳон қилгани тилга олинган. Бу зарбали тўлқин таъсирига ишора қилади.

Хавфли ҳодисалар бир неча марта юз берган бўлишига қарамай, шу пайтгача осмон жисмлари тушиши оқибатида бирорта ҳам одам ҳалок бўлгани қайд этилмаганди. Мана, масалан, 1954 йилда метеорит Американинг Алабама штатида уй томини тешиб ўтиб, Энн Хожес исмли аёлни жароҳатлаган. У шифохонага ётқизилган. Шунингдек, Шарқий Африка ва АҚШда ҳам осмон жисмларининг болалар устига тушганлиги ҳақида хабарлар тарқалган. Ўшанда ҳам соғликка жиддий зарар етмаган.

Олимларнинг фикрича, осмон жисмлари тушиши натижасида одамларнинг ҳалок бўлгани тилга олинган шунга ўхшаган бошқа тарихий далиллар бўлиши мумкин. Ҳозирги кунда инглиз тилидан бошқа тилларда ёзилган ҳужжатлар етарлича ўрганилмаган. Инглиз тилига таржима қилиш устида эса жуда кам мутахассис фаолият олиб бормоқда.