Президент Эммануэл Макрон президентлик пенсиясидан воз кечди, дея хабар бермоқда «Euronews». Бунақаси бўлмаган, айниқса, мамлакатда пенсия ислоҳотига қарши намойишлар кучайган бир чоғда.

Президент пенсияси қанча?

Собиқ француз президентларига, 1955 йилги қонунга кўра, умрбодлик ойлик тўлов (пенсия) белгиланган. Бу, масалан, ҳозирги қийматда амалдаги давлат маслаҳатчисининг маошига тенг — солиққа тортилмасидан бурун 6220 евро.

Макрон ана пенсиядан воз кечган биринчи президент бўлди.

«Биз халқ сайлаганлар намуна кўрсатишлари керак бўлган бир даврда яшаяпмиз», — «Le Parisien» газетаси президент девонидан ана шундай иқтибос келтирди.

Макрон барча собиқ президентлар аъзо Франция Конституцион кенгашига кирмаслигини ҳам билдирди. Демакки, у ойлик 13,5 минг евро даромаддан қуруқ қолмоқда. Аммо бу борада Макрон биринчи эмас, Франсуа Олланд ҳам жўмардлигини исботлаб кетганди.

Янги қонун

Одамларни намойишга ундаган пенсия тўғрисидаги янги қонунга кўра, «пенсия ёши» ўзгармайди — 62 ёш, аммо тўлиқ пенсия олиш учун 64 ёшгача тер тўкишга тўғри келади. Бош вазир Эдуар Филиппнинг уқтиришича, ана шу «ақлли чора» французлар ўртасида минимал пенсияни 1000 еврогача ошириш имконини бераркан.

Бир ярим ҳафта илгари ҳукумат намойишчиларга ён бергандек бўлди, янги қонун аввал-бошдан режалаштирилганидек, 1963 йилда туғилганларга эмас, балки 1975 йил ва ундан кейин туғилганларга татбиқ этиладиган бўлди.

Дарвоқе, Эммануэл Макрон 1978 йилда туғилган, икки йил кўпроқ ишлаб беришига тўғри келади энди...