АҚШ президенти Доналд Трамп мустақиллик учун XVIII асрда кечган кураш ҳақидаги маърузасида нима учун аэропортлар ҳақида гапирганига изоҳ берди. Унинг айтишича, адашиб кетишига телесуфлер ишламай қолгани сабаб бўлган.

«Телесуфлер ишлаб турди-турди ва кейин ўчиб қолди. Батамом ўчди», — дейди Трамп журналистлар билан бўлган учрашувда.

Унинг таъкидлашича, маъруза матнини кўрсатиб турадиган мониторнинг ўчиб қолишига ёмғир сабаб бўлган. «Мен шундоқ ҳам маърузани жуда яхши билардим. Боз устига ёмғир туфайли суфлердан ўқиб бериш жуда қийин бўлаётганди», — дея баёнот берган президент.

Эслатиб ўтамиз, Доналд Трамп АҚШ мустақиллиги нишонланадиган 4 июл санасида сўзлаган нутқида қуйидагиларни айтган эди: «Вэлли-Форжда континентал армия қаҳратон қиш билан тўқнаш келди, Дэлавер сувлари бўйича шуҳрат қозонди ва Йорктаунда Корнуолллисдан (Британия генерали) ғалабани тортиб олди. Бизнинг армиямиз ҳавода устунликка эга бўлди, қалъаларни қўлга киритди, аэропортларни эгаллади ва бажариш лозим бўлган барча ишни амалга оширди».

Эслатиб ўтамиз, Американинг мустақиллиги учун кураш 1775 йилдан то 1783 йилга қадар давом этган ва уруш якунига кўра Буюк Британия АҚШнинг мустақиллигини тан олишга мажбур бўлган эди. Тарихдаги илк самолёт парвози эса 1903 йилда амалга оширилган.