АҚШнинг Миннеаполис шаҳрида комендантлик соати жорий этилди. Бу ерда қора танли фуқаро Жорж Флойд полициячи томонидан бўғиб ўлдирилгандан сўнг тартибсизликлар бошланиб кетган эди.

Шаҳар мэри томонидан таъкидланишича, комендантлик соати жума, шанба ва якшанба кунлари тунги соат 20:00дан тонгги 06:00га қадар давом этади. Ушбу чеклов журналистларга ҳам жорий этилган. Тақиқни бузганлар 1000 доллар жарима ёки 90 кунлик қамоқ жазосига ҳукм қилинади.

Эслатиб ўтамиз, 46 ёшли қора танли Жорж Флойд қоровул бўлиб ишлаган ва 25 май санасида озиқ-овқат дўконидан харидни амалга оширган. Аммо у маҳсулотлар учун қалбаки чек билан тўлашда айбланиб, полициячилар томонидан қўлга олинган.

Полициячилар уни машинасидан тушириб, асфалт устига ётқизишган ва ҳуқуқ тартибот ходимларидан бири унинг бўйнини тиззаси билан босиб турган. Гарчи Жорж Флойд қаршилик кўрсатмаган ва нафас ола олмаётганидан шикоят қилсада, полициячи тиззасини олмаган. Натижада қора танли фуқаро вафот этди.

Шундан сўнг уч кун давомида Миннеаполис ва бошқа шаҳарларда тартибсизликлар авж олди. Намойишчилар дўконларни бузиб, ўмариб, машина ва биноларга ўт қўймоқда. Натижада 170 дан ортиқ ташкилотларга зарар етган.

29 май санасида қора танли шахсни қўлга олишда иштирок этган 4 нафар полициячи ишдан бўшатилди. Уни бўғиб ўлдирган фуқаро Дерек Шовен эса қамоққа олинган. Миннеаолис мэри Жейкоб Фрай эса фуқаролардан кечирим сўраган.