Qirg‘izistonning yangi bosh vaziri ukasini hokimlik lavozimidan chetlatdi
Qirg‘iziston bosh vaziri Ulug‘bek Maripovning lavozimga tayinlanishi bilan amalga oshirgan dastlabki ishi o‘zining qondosh ukasi Baxitbek Maripovni O‘sh viloyati, Novqat tumani hokimligi lavozimidan chetlatish bo‘ldi. Bu haqda «24.kg» xabar berdi.
Qayd etilishicha, Ulug‘bek Maripov manfaatlar to‘qnashuvi sodir bo‘lmasligini ta’minlash uchun ham shunday qaror qabul qilgan.
Qirg‘izistonda mahalliy o‘zini o‘zi boshqarish organlari ijro hokimiyatining bir qismi hisoblanadi va to‘g‘ridan-to‘g‘ri bosh vazirga bo‘ysunadi.
Eslatib o‘tamiz, 2021-yil 3-fevralda Qirg‘iziston parlamenti 41 yoshli Ulug‘bek Maripov nomzodini bosh vazir lavozimiga tasdiqladi. O‘zbekiston Respublikasi bosh vaziri Abdulla Aripov shu kuni Ulug‘bek Maripovga tabrik maktubini yo‘lladi.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter