«Telegram» foydalanuvchilariga xakerlar hujum qildi
Shimoliy koreyalik xakerlar «Telegram» foydalanuvchilariga hujum uyushtirishdi. Bu haqda «Ozod Osiyo» radiosi «Kasperskiy laboratoriyasi»ga asoslanib xabar tarqatdi.
Shimoliy Koreyaning «Lazarus» nomi ostida tanilgan xakerlik guruhi «Telegram» messenjeri orqali zararli dasturiy ta’minotni tarqatgan, deyiladi xabarda.
Xakerlar kriptovalyutalar bilan ishlovchi soxta kompaniyalar tuzib, mijozlarni jalb etishgan va foydalanuvchilarning qurilmalariga zararli dasturlarni joylashtirishgan.
Kiberhujumdan Buyuk Britaniya, Polsha, Rossiya va Xitoy fuqarolari zarar ko‘rgani aytilmoqda. Yetkazilgan zarar miqdori ochiqlanmagan.
Eslatib o‘tamiz, «Lazarus» xakerlari «Sony Pictures» (2014-y.), Bangladesh markaziy banki (2016-y.) va Hindiston bankomatlari (2019-y.)ga kiberhujumlar uyushtirganlikda gumon qilinadi. 2017-yili juda katta miqdordagi pul mablag‘larini o‘zlashtirgan «WannaCry» virusini ham aynan ular tarqatgani aytiladi.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter