Shavkat Mirziyoyev AQSh prezidenti va uning rafiqasiga nimalar sovg‘a qilgani va ularning narxlari ma’lum bo‘ldi, deb yozmoqda «Gazeta.uz».

24-fevral kuni AQSh Federal reyestri e’lon qilgan ma’lumotlarga ko‘ra, AQSh prezidenti Donald Trampning oilasi va prezident administratsiyasining yuqori martabali vakillari 2018-yilda xorijiy davlatlari rahbarlaridan umumiy qiymati 88 420 AQSh dollariga teng sovg‘alar qabul qilishgan. Bu haqda The New York Times nashri xabar bergan.

E’lon qilingan ma’lumotlar orasida 2018-yilning may oyida AQShda rasmiy tashrif bilan bo‘lgan O‘zbekiston prezidenti Shavkat Mirziyoyev tomonidan taqdim etilgan sovg‘alar va ularning qiymatlari ham bor.

O‘zbekiston prezidenti tomonidan Donald Trampga 2950 dollar qiymatga ega «Registon» majmuasining miniatyuraviy kumush nusxasi, uning rafiqasi Melaniya Trampga esa 4200 AQSh dollar qiymatiga ega choyshab sovg‘a qilingan. AQSh Davlat kotibi Mayk Pompeo esa Shavkat Mirziyoyevdan 1580 dollar qiymatiga ega yog‘och stol va stullar to‘plamini qabul qilib olgan.

AQSh prezidenti oilasi va administratsiyasi vakillariga taqdim etilgan sovg‘alarning deyarli barchasi Milliy arxivda saqlanadi, lekin sovg‘ani qabul qilgan shaxslarga ularni sotib olish imkoniyati berilgan.