«Za rulyom» jurnalida avtoekspert Ilya Pimenovning mashinani qishda qanday avaylab minishga bag‘ishlangan maslahati chiqdi.

Ayrim haydovchilar bilib-bilmay o‘z avtomobillariga jiddiy zarar yetkazib qo‘yishadi. Ayniqsa, qishda. Hatto eng qimmat va zamonaviy «inomarkalar» ham ehtiyotsizlik qurboni bo‘lishi hech gapmas.

Albatta, Rossiya qorli-qirovli, sovuq o‘lka. Bizda qor kam bo‘lgani bilan, baribir sovuq. Balki bu maslahatlar kimgadir asqotib qolar.

1-usul. Qizdirilmagan motor

Qizdirilmagan motor bilan mashinani haydash zararli ekanini bilmaydigan haydovchining o‘zi yo‘q. Ammo hamma ham amal qilarmikan? Qish pallasida mashinani haydashdan oldin motorini kamida besh daqiqa qizdirish kerak. «Sovuq start» dvigatel u yoqda tursin, uzatmalar qutisiga ham koni ziyon.

2-usul. «Quvnoq» startlar va tormoz

Mashinani gazlab turib, joyidan keskin qo‘zg‘alish va xuddi shuning aksi — keskin tormozlanish shinalar yedirilishiga va tormoz tizimi detallari yaroqsiz holatga tushishiga olib keladi. Bunaqa qilish mashina osma tizimi (podveska)gayam zarar.

3-usul. Drift

Ba’zilar qo‘l tormozidan foydalanib drift qilishdan zavq oladi. Ammo doim esda tutish kerak, qo‘l tormozi birda bo‘lmasa birda ishlamay qolib pand berib qo‘yishi mumkin. Driftlar qo‘l tormozidan tashqari yana tormoz supportlari, variatorlar va mexanik uzatmalar qutisi uchun ham zararli. Ayrim kinofilmlarga ishonmang, ular maxsus tormozlardan foydalanishadi. Hammasini professionallar bajaradi.

4-usul. Kun isisa yuvarman

Qish, sovuq bo‘lishiga qaramay, mashinani vaqtida «cho‘miltirib» turgan yaxshi. G‘ildirak disklarida to‘planib qolgan suv-loylar muzlab, shinalar tez yedirilishi, g‘ildirak podshipniklari va boshqaruv ruli mexanizmlari tez ishdan chiqishi mumkin. Qolaversa, yo‘llar muzlaganda sepiladigan tuzlar ham mashina uchun zararli (Darvoqe, yo‘lga sepiladigan tuzlar poyabzalingiz uchun ham zararli ekanini bilasizmi?).  Shuning uchun ham mashinani toza saqlang.

5-usul. «Qor ko‘rpa»

Qor yoqqanidan keyin mashina ustidagi «qor ko‘rpasi» bilan kunlab qolib ketishi aslo yaramaydi. Bunning oqibatida elektrikasi, rezina, plastik va hatto metall detallarigacha zararlanishi hech gapmas.