Xabarlar tezkor Telegram kanalimizda Obuna bo'lish ×

Ekologik toza mahsulot nima?

Ekologik toza mahsulot nima?

Ekologik toza mahsulotning ilmiy sinonimi organik mahsulot, deb ataladi. Olimlar ekologik toza mahsulot inson sog‘lig‘iga zarar yetkazmasligi, kelajak avlod salomatligiga salbiy ta’sir ko‘rsatmasligi va yuqori ijtimoiy-iqtisodiy samaraga ega bo‘lishini asoslab berishgan. Tadqiqotlar shuni ko‘rsatganki, ekologik toza mahsulotlar iste’mol qilinganda odamlarning o‘rtacha umr ko‘rish yoshining ortishi, aholi orasida har xil kasalliklar tarqalish darajasi hamda bolalar o‘limining kamayishi va boshqa muhim ijobiy ko‘rsatkichlarga erishilgan.

Organik mahsulotlar deyilganda organik so‘zi «cheklangan» ma’nosini anglatib, qo‘shimcha mineral o‘g‘itlarsiz, zaharli ximikatlarsiz va boshqa texnogen ta’sirlarsiz mahsulot yetishtirish yoki tabiiy toza xomashyolardan olingan, zamonaviy texnologiyalar asosida yetishtirilgan mahsulotlardir.

Bugungi kunda dunyoning rivojlangan mamlakatlarida organik-ekologik toza mahsulot yetishtirish va unga bo‘lgan talab tobora ortib bormoqda. Yevropa mamlakatlarida ekologik toza mahsulotlarga yillik talabning o‘sishi Germaniyada 5–15 foiz, Daniya, Shvetsiya va Shveysariya davlatlarida 30–40 foizga ortgan.

Mamlakatimizda hali organik qishloq xo‘jaligi yoki organik dehqonchilik tushunchasi to‘g‘risida ma’lumotlar yetarli emas. Uning qonun darajasidagi talablari ham hozircha ishlab chiqilmagan, organik toza mahsulot standartlari hamda bunday mahsulotlarni tartibga soladigan va markirovka qiladigan xuquqiy asoslar yaratilmagan.

Ekologik toza mahsulot yetishtiriladigan yerlarda avvalo 3 yil davomida tozalash tadbirlari o‘tkazilishi talab etiladi. Shundan so‘nggina yer tekshirilib, organik-ekologik toza mahsulot yetishtirish uchun sertifikat beriladi.

Mahsulot yetishtirishda turli kimyoviy vositalar, mineral o‘g‘itlardan foydalanish va genetik modifikatsiyalangan ekin navlarini ekish qat’iyan taqiqlanadi. Bunda asosiy agrotexnik tadbirlar qo‘l mehnati evaziga bajariladi. Shunday usulda yetishtirilgan mahsulotlar organik yoki ekologik toza mahsulot nomini oladi va tarkibida 95 foizgacha organik modda bo‘ladi.

Siz bozordan sotib olayotgan kartoshka, piyoz qanday yetishtirilgani, kimyoviy o‘g‘itlar solingan yoki solinmagani bilan qiziqqanmisiz?

Izohlar 0

Izoh qoldirish uchun saytda ro'yxatdan o'ting

Kirish

Ijtimoiy tarmoqlar orqali kiring