Gana Respublikasi fuqarolari Emmanuel Akvey hamda Sussanna Mfumlarning Andijon shahrida tug‘ilgan farzandlari Marven va Arvenlarning tug‘ilganlik haqidagi guvohnomalari topshirildi. Bu haqda Davlat xizmatlari agentligi Andijon viloyati boshqarmasi axborot xizmati xabar berdi. 

Xabarda aytilishicha, 23-dekabr kuni Andijon shahar fuqarolik holatlari dalolatnomalarini yozish bo‘limiga Gana Respublikasi fuqarolari Emmanuel Akvey hamda Sussanna Mfumlar Andijon viloyat perinatal markazida o‘g‘il egizak farzandlarni dunyoga keltirganligini bildirib, ularning tug‘ilganligini qayd etishda amaliy yordam so‘rab murojaat qilgan. Ularning murojaati FHDYo bo‘limi tomonidan tegishli tartibda ko‘rib chiqilib, bolalarning haqiqatan Andijon shahrida tug‘ilganligi tasdiqlanib, dalolatnoma yozuvlari qayd etilgan.

24-dekabr kuni Davlat xizmatlari agentligi Andijon viloyati boshqarmasi boshlig‘i Mahmudjon Abdijaliyev tomonidan xorijlik fuqarolarga farzandlari Marven va Arvenlarning tug‘ilganlik haqidagi guvohnomalari topshirildi.