Android qurilmalar uchun Xabar.uz mobil ilovasi. Yuklab olish ×
IOS qurilmalar uchun Xabar.uz mobil ilovasi. Yuklab olish ×

IIV Jazoni ijro etish bosh boshqarmasi «Jallod» laqabli mahbus ozodlikka chiqarilishini inkor qildi

IIV Jazoni ijro etish bosh boshqarmasi «Jallod» laqabli mahbus ozodlikka chiqarilishini inkor qildi

Joriy yilning 31 mart kuni «Ozodlik.org» internet saytida «Mahbuslarni qamoqda qiynagani ortidan qamalgan «Palach»ning afv qilinish ehtimolidan faollar tashvishda» sarlavhasi ostida maqola e’lon qilingan edi. Mazkur maqolada keltirib o‘tilgan vajlarga javoban IIV JIEBB Axborot xizmati quyidagilarni ma’lum qildi:

Navoiy viloyati 11-son jazoni ijro etish koloniyasida jazo muddatini o‘tayotgan mahkum Djumayev Nozim Narziyevich muqaddam og‘ir turdagi jinoyatlarni sodir qilganligi uchun 4 marotaba sudlanlanib, yana uyushgan jinoiy guruh tarkibida o‘ta og‘ir turdagi jinoyatni sodir etib, 20 yil muddatga ozodlikdan mahrum qilingan.

Mahkum N.Djumayevga jazo muddatini o‘tayotgan boshqa mahkumlar qatori O‘zbekiston Respublikasi Jinoyat ijroiya kodeksida nazarda tutilgan shart-sharoitlar yaratilgan bo‘lib, alohida imtiyozlar yoki ma’lum bir yengilliklar yaratilmagan.

Mahkum N.Djumayev uyushgan guruh tarkibida jinoyat sodir etganligi sababli, unga nisbatan O‘zbekiston Respublikasi Jinoyat kodeksida ko‘rsatilgan, muddatidan ilgari shartli ozod qilish yoki jazoni yengilrog‘i bilan almashtirish bilan bog‘liq bo‘lgan insonparvarlik dalolatnomalari qo‘llanilmaydi.

Bundan tashqari, mahkum N.Djumayev jazo muddatini o‘tash davomida muntazam ravishda belgilangan ichki tartib qoidalarni buzib kelganligi sababli unga nisbatan intizomiy jazo choralari qo‘llanilib, O‘zbekiston Respublikasi Jinoyat ijroiya kodeksining 112-moddasi talablariga muvofiq saqlash rejimini ashaddiy buzuvchi – deb topilgan. Navoiy shahar sudining 2019 yil 2 oktyabrdagi ajrimiga ko‘ra, uning jazoni o‘tash tartibi o‘zgartirilib, qattiq tartibli koloniyadan 3 yil muddatga turma tartibiga o‘tkazilgan.

O‘zbekiston Respublikasi Prezidentining avf etish to‘g‘risidagi Farmon talablari asosida jinoyat sodir etgan shaxslar avf etishni so‘rab iltimosnoma bilan murojaat qilishga haqli, lekin mahkum N.Djumayev jazo muddatini o‘tash davomida afv etish to‘g‘risida iltimosnoma bilan murojaat qilmagan.

Maqolada keltirib o‘tilgan, ya’ni Navoiy viloyati Qiziltepa tumanidagi qamoqxona sobiq maxbuslardan biri (ismi sir qolishini istagan) Ozodlikka aytishicha go‘yoki «diabet» kasaliga chalingan degan vaj bilan N.Djumayevga Navoiy viloyatidagi qattiq rejimli 64/46 koloniyada aloxida yaxshi sharoit yaratib berilganligi holati yuzasidan quyidagilarni ta’kidlash lozim.

Jinoyat ijroiya qonunchiligiga muvofiq, jazoni ijro etish koloniyalari umumiy, qattiq, maxsus va turma tartibli muassasalarga bo‘linib, jazo o‘tash shartlari bir-biridan farq qiladi hamda sud tomonidan umumiy tartibli koloniyalarda o‘tash belgilangan mahkumlar qattiq tartibli koloniyalarda jazo o‘tamaydilar.

Shu sababli, Navoiy viloyati Qiziltepa tumanidagi 5-son koloniya umumiy tartibli bo‘lib, u yerda jazo muddatini o‘tagan shaxs 11-son (64/46) qattiq tartibli koloniya to‘g‘risida aniq ma’lumotga ega bo‘lmasdan fikr bildirganini anglash mumkin.

Bundan tashqari, jazoni ijro etish tizim xodimlari jazoni ijro etish muassasalariga faqatgina o‘z xizmat vazifalarini bajarish uchun kelib, sport mashg‘ulotlari IIVning tegishli normativ hujjatlariga muvofiq hududiy ichki ishlar organlarida tashkil qilingan sport maydonchalarida o‘tkaziladi.

Amaldagi qonunchilikka muvofiq, advokatlar himoya ostidagi shaxslar bilan uchrashish jarayonida elektron vositalardan (mobil telefon, fotoapparat va diktofon) foydalanishlari mumkinligi qat’iy belgilangan bo‘lib, maqolada yoritilgan video lavhani mahkum N.Djumayev bilan uchrashuvga kelgan advokati tomonidan tasvirga olinganini taxmin qilish mumkin.

Mazkur holat yuzasidan, bugungi kunda Jazoni ijro etish bosh boshqarmasi tomonidan surushtiruv ishlari olib borilmoqda, uning natijasidan kelib chiqqan holda tegishli qaror qabul qilinadi.

Shuningdek, tekshiruv davomida sport bilan shug‘ullanayotgani ko‘rinishdagi video lavha mahkum N.Djumayev ozodlikdan mahrum qilingunga qadar tasvirga olinganligi aniqlandi.

«Ozodlik.org» internet saytida e’lon qilingan maqolada IIV JIEBB Axborot xizmati xodimi bilan suhbatlashganligi holati bo‘yicha shuni ta’kidlash lozimki, bugungi kunga qadar Bosh boshqarma Axborot xizmati xodimiga «Ozodlik.org» internet sayti muxbirlari biror marotaba murojaat bilan chiqmagan.

Maqolada ko‘rsatilgan holatlar, ishonchli manbaga tayanmasdan, bir tomonlana yondoshgan holda ijtimoiy tarmoqlarda e’lon qilingani natijasida foydalanuvchilarda Jazoni ijro etish tizimi bo‘yicha salbiy fikrlar paydo bo‘lishiga sabab bo‘lgan.

Yuqorida qayd etilganlardan kelib chiqqan holda, O‘zbekiston Respublikasi Ichki ishlar vazirligi jazoni ijro etish bosh boshqarmasi maqolada keltirilgan holatlarni qat’iy ravishda rad etadi.

IIV JIEBB Axborot xizmati

Izohlar 0

Izoh qoldirish uchun saytda ro'yxatdan o'ting

Kirish

Ijtimoiy tarmoqlar orqali kiring