Izboskan tumani, Poytug‘ shahrida poyezd relsdan chiqib, zovurga tushib ketgani xabar qilingandi. IIV axborot xizmati hodisa tafsilotlarini ma’lum qildi.

Qayd etilishicha, 2019-yil 12-dekabr kuni soat 11.10 larda Paytug‘ temir yul bekati boshlig‘i A.Usmonovning telefon orqali bergan xabariga ko‘ra, bugun soat 07:30 larda Qozog‘iston Respublikasidan 13 ta yarim ochiq vagonlarda «OOOTA Minirals» MChJ nomiga ko‘mir mahsulotlari keltirilgan.

Paytug‘ temir yo‘l bekatining 7-yo‘liga qo‘yilgan va ko‘mir mahsulotlari tushirib bo‘lingandan keyin vagonlarning g‘ildiraklari tagiga temir yo‘l bashmaklari mahkamlanmaganligi sababli, ushbu yarim ochiq bo‘sh vagonlar past tomonga harakatlanib ketishi natijasida 63080675-sonli yarim ochiq bo‘sh vagon temir yo‘lning chap tomonidagi ariqqa tushib ketgan va 60745015-sonli yarim ochiq bo‘sh vagonning oldi g‘ildiraklari temir yo‘l izidan chiqib ketgan.

Hodisa natijasida tan jarohati olganlar yo‘q.

Hozirda qo‘shimcha surishtiruv ishlari olib borilmoqda.