2019-yil 29-noyabr kuni soat 07-15larda, Buxoro viloyati Jondor tumani hududidan o‘tgan A-380 «G‘uzor-Buxoro-Nukus-Beyneu» avtomobil yo‘lining 305-kilometrida mudhish YTH sodir bo‘lgani haqida xabar berilgandi.

O‘zbekiston Respublikasi IIV YHXBB xabariga ko‘ra, haydovchi Andijon viloyati Andijon shahrida yashagan, 1997-yilda tug‘ilgan S.X. «Neksiya» rusumli avtomobilini «Toshkent-Xorazm» yo‘nalishida boshqarayotib, rulda uxlab qolishi oqibatida, qarshisidan harakatlanib kelayotgan, Buxoro shahrida yashovchi, 1976-yilda tug‘ilgan X.M. boshqaruvidagi «Higer» rusumli avtobusining yo‘liga chiqib, to‘qnashuv sodir etgan.

To‘qnashuv natijasida «Neksiya» rusumli avtomobil haydovchisi va ikki nafar yo‘lovchilari voqea joyida halok bo‘lganlar.

O‘zbekiston Respublikasi Ichki ishlar vazirligi Yo‘l harakati xavfsizligi bosh boshqarmasi haydovchilardan kuchli toliqish holatida transport vositalarini boshqarmaslikni so‘ragan holda bunday holatda harakatlanish haydovchi va yo‘l harakatining boshqa ishtirokchilari xavfsizligiga tahdid solishi haqida ogohlantirgan.