Йўловчи поездларига чипта олиш анча осонлашади. Бу ҳақда «O‘ztemiryo‘lyo‘lovchi» АЖ матбуот хизмати Xabar.uz учун маълумот бериб ўтди.

Тошкентда Марказий ҳамда жанубий темир йўл вокзаллари чиптахоналарида электрон навбат жорий қилинди, электрон табло ва мониторлар ўрнатилди. Эндиликда, ҳар иккала вокзалга келган йўловчи, электрон навбат олади ҳамда ўриндиқларда ўтириб, залга ўрнатилган мониторларни кузатиб туради.

Навбат ҳамда касса рақами мониторда кўриниши билан, чипта харид қилиш учун ўша кассага бориб мурожаат қилиши мумкин. Бу биринчи галда, кассалар олдида узундан-узун навбатга туриш ва турли хил тушунмовчиликларнинг олдини олса, иккинчидан операторлар томонидан йўловчиларга сифатли ва тез хизмат кўрсатиш имконини беради.

Чиптахона залига ўрнатилган электрон таблодан эса, йўловчилар «Ўзбекистон темир йўллари» АЖ веб сайтига кириб поездлар ҳаракат жадвали ва бошқа маълумотларни олишлари мумкин. Яна бир муҳим янгилик, Тошкент марказий темирйўл вокзали чиптахона залида ўрнатилган катта экранда қайси поездга ва қайси вагонда чипта бор йўқлиги кўриниб туради. Бу ҳам йўловчиларга катта қулайлик яратади.

Жамият томонидан чиптахоналарга ўрнатилган мазкур электрон ускуналар синов тариқасида ишлатилмоқда. Келажакда бундай қулайликлар республикамизнинг худудларидаги темир йўл вокзалларида ҳам жорий қилиниши кўзда тутилган.