Қозоғистон пойтахти Остонада қозоқ тилини ўрганувчилар учун «Мәміле-Тен» клуби очилди. Клубни корейс миллатига мансуб Владислав Тен очди, дея хабар берди «El.kz» сайти.

Владислав Тен Ўзбекистонда туғилиб ўсган, 22 ёшигача фақат рус тилида сўзлашган. Университетнинг учинчи курсида ўқиб юрган пайти, Жанубий Кореяда малака ошириш таклифини олганидан сўнг, инглиз тилини ўрганишга киришган.

Шу пайтдан унда чет тилларига қизиқиш кучайиб кетди. Инглизчадан сўнг ўзбек тилини ўрганди. Ҳозир у бешта тилни билади.

— Қозоғистонга 2010 йили келганман. Аввалига тиббиёт марказида ишладим. Асосий ишим билан бирга тил ўрганишда давом этдим. Қозоқ тилини ўзлаштиришга бир ярим йил сарфладим. Вақт ўтиши билан тилларни ўрганиш бўйича шахсий усулим шаклланди. Тажрибамни кенг ёйиш мақсадида тилларни ўргатиш марказини очишга қарор қилдим, — дейди Владислав Тен.

«Қозоқ тилини ўргатиш усулим бошқачароқ, чунки у мен учун хорижий тил. Умуман олганда, хорижликка ҳам, ўз она тилини билмайдиган қозоққа ҳам бу бирдай бегона тил. Кўплаб дарсликларда эса янги мавзулар уларни худди ўқувчилар олдиндан биладигандек тушунтирилади. Аммо тилни энди ўрганишни бошлаган одам учун бу ғалати ва оғир. Мураббийлар ўзларини ўқувчилар ўрнига қўйиб кўришлари ва ўргатишни бошидан бошлашлари керак», — дейди В.Тен.

Владислав тилни ўргатишни энг биринчи қоидалардан бошлайди. Сўнгра ўқувчиларини тажрибалироқ ўқитувчиларга йўналтиради. Унинг айтишича, сўнгги пайтларда қозоқ тилини ўрганиш истагидагилар сони анча кўпайган.

«Марказимизга кўпгина таниқли инсонлар келишади, якка тартибда тил ўрганишади, бироқ номларини сир тутишимизни исташади. Уларнинг интилишлари мени қувонтиради. Агарда қозоқ тили тараққиётига қўшаётган ҳиссам 1 фоиз бўлса ҳамки — мен учун катта шараф, бекорга яшамаётганимни англатади», — дейди айни пайтда Қозоғистон фуқароларига қозоқ тилини ўргатаётган ҳамюртимиз Владислав Тен.