Хабарлар тезкор Телеграм каналимизда Обуна бўлиш ×

У Европада ўйнаганидан мамнун, аммо Осиё барибир яхшироқ — Сардор Рашидов гол урди

У Европада ўйнаганидан мамнун, аммо Осиё барибир яхшироқ — Сардор Рашидов гол урди

Фото: ЎФА матбуот хизмати

Ўзбекистон миллий терма жамоаси ярим ҳимоячиси Сардор Рашидов куни кеча «Қатар СК» клуби аъзосига айланди.

Бунга қадар Португалиянинг «Насьонал» клуби сафида ўйнаб келаётган ўйинчи яна ўз фаолиятини Қатар Юлдузлар Лигасида давом эттирадиган бўлди. 28 ёшли Рашидов ЎФА расмий сайтига янги жамоасидаги илк таассуротлари ва режалари хусусида гапириб берди.

— Португалия чемпионатида ўйнаш орқали Европа футболи ҳавосидан нафас олишга эришдим ва бундан хурсандман. Ана энди бор диққат-эътиборимни «Қатар СК» билан муваффақиятларга эришиш ва гранд клубларга етарлича қаршилик кўрсатишга қаратаман.

Айни пайтда «Қатар СК» Мадридда йиғин ўтказмоқда. Ушбу йиғин 8 август куни якунига етади. Ҳали бир нечта ўртоқлик ўйинларида майдонга тушамиз. Мақсадимиз — имкон қадар тезроқ яхши формага кириш. Зеро яқинда Қатарда янги мавсум старт олади.

Қатарда мазмунли ўйин кўрсатиш орқали ўзимга янада ишонч олиб, терма жамоамизга яқинда бошланадиган саралаш баҳсларида ёрдам беришга ҳаракат қиламан.

Қатар чемпионати мен учун бегона эмас, бу ерда тўп суришни рости соғинган эдим. «Қатар СК»га ўтишимда илгари мен фаолият олиб борган «Ал Жаиш»даги танишларимнинг ҳам хиссаси катта бўлди. Насиб этса, ушбу клуб сафида мазмунли ўйин намойиш этишга ҳаракат қиламан, — деди футболчи.

Таъкидлаб ўтамиз, жиззахлик ярим ҳимоячи фаолияти давомида «Сўғдиёна», «Бунёдкор», «Ал Жаиш» (Қатар), «Ал Жазира» (БАА), «Локомотив», «Насьонал» (Португалия) клублари сафида фаолият олиб боришга улгурган.

Айни пайтда Сардор Рашидов тўп сурадиган «Қатар СК» Мадридда йиғин ўтказмоқда. Ушбу йиғин 8 август куни якунига етади. Унга қадар эса жамоа бир қатор назорат учрашувлари ўтказади.

Бугун қатарликлар махаллий «Интернасьонал де Мадрид» жамоасига қарши назорат ўйини ташкил этишди. Учрашувда «Қатар СК» 1:2 ҳисобида имкониятни бой бериб қўйди. Диққатга сазовор жиҳати шундаки, мазкур ўйинда «Қатар СК» сафидаги ягона голга ҳамюртимиз муаллифлик қилди.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг