Профессионал боксда юқори натижаларни қайд этиб келаётган Шоҳжаҳон Эргашев нафақат Ўзбекистон, балки хорижлик мухлислар қатори етук мутахассислар назарига ҳам тушган. «Дарё» мухбири Миролим Исажонов Бутунжаҳон бокс ассоциацияси (WBA) рейтингида 4-ўринни эгаллаб турган, -63,5 кг вазн тоифасида жанг ўтказиб келаётган фарғоналик чарм қўлқоп устаси билан қизиқарли суҳбат уюштирибди. Ушбу суҳбатнинг қизиқарли қисмларини ҳавола этамиз.

— Спорт оламини танлашангизнинг боиси нима?

— Падаримнинг ўзи боксчи бўлганлиги боис мени ҳам касбига кичкиналигимдан қизиқтирган. 6 ёшимда машина уриб юборганидан сўнг шифокорлар бокс билан шуғулланишимни қатъий тақиқлашган. Жароҳат оғирлиги ва қулоғимнинг орқасини тикишгани туфайли ҳатто мени ўлиб қолади, дея хавотирга ҳам тушишган. Бир неча йил мактабга ҳам бормай, уй синфида таҳсил олдим. Менинг аҳволимни кўрган дадам «Таниқли боксчи бўлмаса-да, спорт орқали саломатлигини мустаҳкамласин», деган фикрда мен билан шуғулланишни давом эттирган. Ҳар куни оз-оздан машғулотлар ўтказиб, бошимга тушадиган муштга чап беришни ўргатган. 6-синфдан эса бокс тушишни бошладим.

— Маълум вақт футбол билан ҳам шуғулланганлигингиз ростми?

— Юқорида айтганимдек, қишлоғимизда юз берган кучли автофалокатдан кейин отам соғлом ҳаёт кечиришимни истаб, мени турли спорт турларига қизиқтирган. Ўша кезларда бокс билан шуғулланиш баробарида юқори даражада футбол ҳам ўйнаганман. Тўрт йил давомида Фарғона вилоятининг турли жамоаларида тўп суриб, Ўзбекистон чемпионатининг олий лигасида «Нефтчи» жамоаси шарафини ҳимоя қилганман. Ҳужум чизиғида ўйнаганим учун олий лига учрашувларида гол уришга муваффақ бўлганман.

— Миллионлар ўйинини нима сабабдан тарк этгансиз?

— Ўша пайтларда фурсати келиб, футбол ёки боксни танлашим шартлигини доимо ҳис қилардим. Чунки энг оммавий ҳисобланган бу икки спорт турининг талаблари бир-бирига умуман зид. Қолаверса, бокс борасида кўпроқ тушунча ва сир-асрорларга эгалигим ҳамда қизиқишим устунлиги сабаб шу спорт турини танлашга қарор қилганман. Агар футболни танлаганимда ҳам мендан яхшигина футболчи чиқарди.

— Биринчи профессионал жангда қозонган ғалабангиз эвазига қанча гонорар олгансиз?

— Бошидаги учта жангимдан умуман ҳақ олмаганман. У вақтда бош мақсадим менга мураббийлик қилган россиялик Сайфулло Пўлатовдан кўпроқ билмаганларимни ўрганиш ва ўз номимни танитиш бўлган. Гонорарни эса тўртинчи жангимда олганман.

— Ҳаваскор боксда бир қатор ютуқларга эришиб, эл назарига тушган боксчиларимизнинг бир неча нафаридан интервью олишга қийналдик. Сиз эса таклифимизга бажонидил розилик билдирдингиз. Ҳозир амин бўляпманки, ҳамон самимий ва одамоҳунсиз. Ўзингизни юлдуз боксчи, деб ҳисобламайсиз, назаримда.

— Мен кечаги кунини унутадиган инсон эмасман. Профессионал боксдаги фаолиятимни бошлашдан олдин уч ярим йил Россиянинг турли ҳудудларида мигрант сифатида ишлаб, ўзига хос қийинчиликларни кўрганман. Мен ҳам барча қатори оддий одамман. Бировдан устунлик жиҳатим йўқ, деб ўйлайман. Кўча-кўйда ҳам бокс мухлислари таниб қолиб, расмга тушишни таклиф қилишса, йўқ демайман ва бундан бениҳоя хурсанд бўламан. Негаки, спорт мухлислар билан қизиқ. Мухлиси бўлмаган боксчи ўзини спортчи санамаса керак. Менимча, спортда юлдузлик касалига учраган одам ривожланишдан тўхтайди.

— Боксдан ташқари яна қайси спорт турларига қизиқиб, кузатиб борасиз?

— Ҳануз футболнинг ашаддий мухлисиман. Вақт топиб, тўп суриб туришга ҳаракат қиламан. Бир пайтлар от спорти билан ҳам шуғулланиб, бир неча карра мусобақаларда ғолибликни қўлга киритганим учун ҳозир баъзан бўлса-да от минаман. Ит боқишга ҳам қизиқаман. От ҳамда итнинг инсонга вафодор дўст бўлишига қаттиқ ишонаман ва уларга меҳрим кучли.

— Китоб мутолаасига иштиёқингиз қандай? Бадиий адабиётлар ўқиб турасизми?

— Кўпроқ диний адабиётлар ўқишни ёқтираман. Ҳозир Шайҳ ҳазратларининг «Бахтиёр оила» асарини мутолаа қилаяпман.

— Шаҳрам Ғиёсов иккингиз ўртангизда жанг ўтказилиши ҳақида анча гап-сўзлар тарқалди. Аммо бу спектаклга ҳам ўхшади. Жанг бўлиши аниқми?

— Жангга тайёргарлик бошланган. Лекин унинг қачон ўтказилиши маълум эмас. Ҳаммасини вақт кўрсатади.

— Қайси жанг сиз учун оғир кечган?

— Ҳар битта жангда осонликча курашиб бўлмайди. Ўтган йили хитойлик 32 ёшли Жимин Ванг билан ўтказган 10 раундлик жангни 7-раундида елкам синиб кетган. Бир қўлим билан 3 раундни бир амаллаб тугатиб, ғолиб бўлишга эришганман. Шу жанг бошқаларига нисбатан оғир ўтган.