Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

Оксана Чусовитинадан яна бир рекорд. У саккизинчи Олимпиадасига боради

Оксана Чусовитинадан яна бир рекорд. У саккизинчи Олимпиадасига боради

Спорт гимнастикаси бўйича етти карра олимпиада ўйинлари иштирокчиси Оксана Чусовитина 2020 йил Токиода бўлиб ўтадиган Ёзги олимпиада ўйинлари йўлланмасини қўлга киритди. Бу ҳақда GoSport.uz интернет-нашри манбалари хабар бермоқда.

Бу натижа орқали у фаолияти давомида саккизинчи олимпиадада иштирок этадиган бўлди ва ўзининг Гиннес рекордлари китобидаги рекордини янгилади.

Германиянинг Штутгарт шаҳрида бўлиб ўтаётган спорт гимнастикаси бўйича жаҳон чемпионати баҳсларининг таяниб сакраш турида иштирок этаётан 44 ёшли Чусовитина индивидуал баҳсларда Олимпиада йўлланмасини берувчи нормани бажарди ва саккизинчи бор бундай нуфузли турнирда иштирок этиш ҳуқуқини қўлга киритди.

Чусовитинадан ташқари мазкур мусобақада иштирок этаётган яна бир ўзбекистонлик спортчи Расул Абдураҳимов яккалик баҳсларда қайд этган натижаси билан олимпиада йўлланмасини қўлга киритди. Шу тариқа Олимпиада йўлланмасини қўлга киритган ўзбекистонлик спортчилар сони айни вақтга келиб 10 нафарга етди.

Маълумот учун, Оксана Чусовитина 1992 йилдан бошлаб 2016 йилга қадар ўтказилган барча етти олимпиада ўйинларида иштирок этган. Бу спорт гимнастикаси тарихидаги энг яхши натижа бўлиб, спортчи 2016 йилда Гиннеснинг рекордлар китобидан жой олганди. Олимпиадалар тарихидаги мутлақ рекордчи эса от спорти устаси канадалик Иан Миллер саналади. У 1972 йилдан 2012 йилга қадар жами 10та Олимпиада ўйинларида иштирок этган.

Чусовитина 1992 йилда МДҲ терма жамоаси таркибида олимпиада олтин медалини қўлга киритган. 2008 йилги Пекин олимпиадасида эса Германия терма жамоаси сафида иштирок этиб кумуш медалига сазовор бўлган. Бундан ташқари у уч карра жаҳон чемпиони (биттасида Ўзбекистон терма жамоаси таркибида), тўртта кумуш (иккитаси Ўзбекистон терма жамоаси таркибида) , тўртта бронза (учтаси Ўзбекистон таркибида) медалларини қўлга киритган. Икки карра Осиё ўйинлари чемпионлигини, тўртта кумуш ва иккита бронза медалларини қўлга киритган. Германия терма жамоаси билан эса Европа чемпионлиги ва Европа чемпионатининг тўртта кумуш медалини қўлга киритган.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг