Таиландда бўлиб ўтаётган 23 ёшгача футболчилар ўртасида Осиё чемпионатининг чорак финалида Ўзбекистон олимпия терма жамоаси БАА билан куч синашади.

Мазкур беллашувдан бир кун олдин жамоалар бош мураббийлари ўртасида матбуот анжумани ўтказилди. Унда олимпия терма жамоаси устози Любинко Друлович эртанги ўйин ҳақида ўз фикрларини билдирди:

— Бизни катта ўйин кутмоқда. Яқинда ўтказилган ўртоқлик ўйинида БАА кучли ҳаракат қилган ва ғалаба қозонганди. Рақибга нисбатан тикланишга вақтимиз кўпроқ бўлди. Биз орзуимиз — Олимпиада ўйинлари сари интилишда давом этамиз.

Бизда аввалги турнирда иштирок этган 8 нафар футболчи бор. Уларнинг тажрибаси кўпроқ. Бироқ бу сафарги турнир Олимпиада йўлланмаси учун кечмоқда. Ўйинлар оғир бўляпти, ҳамма жамоада мотивация юқори. Чемпионликни ҳимоя қилиш осон эмас.

Жанубий Кореяга қарши учрашувдан кейин мен айтгандим: биз турнир етакчилари билан ўйнадик ва гуруҳдан чиқдик. Бу эса осон кечгани йўқ. Биз бу сафар кучимизни тўлиқ тиклашимизга ишончим комил. БААга қарши учрашувгача жисмоний ҳолатимиз яхшиланади.

Беллашувлар жуда кескин ўтди. Битта гол фарқи кўп учрашув масаласини ҳал қилди. Япония, Эрон, Ироқ, Қатар каби кучлилар эса гуруҳда қийинчиликка дуч келишди. Айни вақтда турнирда 8 та энг кучли терма жамоа қолди. Буёғига ўйинларни кичик деталлар ҳам ҳал қилиб қўяди, — деди Друлович. 

Эслатиб ўтамиз, БАА — Ўзбекистон учрашуви 19 январь куни Тошкент вақти билан 18:15 да старт олади.