2019 йил 19-20 февраль кунлари Тошкент шаҳрида «Марказий Осиёда ўзаро муносабатлар: янги имкониятлар» халқаро конференцияси бўлиб ўтади. Бу ҳақда Ташқи ишлар вазирлиги матбуот хизмати хабар берди. 

Конференция очилишида Ўзбекистон президенти Шавкат Мирзиёев нутқ сўзлаши режалаштирилган.

Конференцияга Озарбайжон, Афғонистон, Бельгия, Буюк Британия, Венгрия, Германия, Грузия, Дания, Миср, Исроил, Ҳиндистон, Эрон, Испания, Италия, Қозоғистон, Канада, Хитой, Кувайт, Қирғизистон, Латвия, Малайзия, Нидерландия, Покистон, Польша, Россия, Саудия Арабистони, АҚШ, Таиланд, Туркия, Ўзбекистон, Украина, Финляндия, Франция, Швеция, Япония каби давлатларнинг 100 дан ортиқ таҳлилий марказларидан етакчи экспертлар таклиф қилинган.

Конференция давлатимиз раҳбари томонидан белгилаб берилган Ўзбекистон ташқи сиёсатининг асосий устувор йўналишларини амалга ошириш доирасида ўтказилаётгани маълум қилинган.

Конференция Ўзбекистон Ташқи ишлар вазирлиги ва БМТнинг Марказий Осиёдаги дипломатияси бўйича Минтақавий маркази томонидан ташкил этилмоқда.