Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

«UzAuto Motors» яна муаммога дуч келди

«UzAuto Motors» яна муаммога дуч келди

Фото: «Xabar.uz»

«UzAuto Motors» компанияси яна бир муаммога дуч келгани ҳақида харидорларига мурожаат қилди.

Аввалроқ яримўтказгичларнинг глобал етишмовчилиги сабаб ўзбек ишлаб чиқарувчиси бир қатор автомобиллар учун шартнома тузишни тўхтатиб қўйганди.

Энди, микрочипларнинг танқислиги «UzAuto Motors» компанияси учун ягона бўлган GM сертификатига эга автомагнитола ишлаб чиқарувчи «Humax» корхонасини ҳам четлаб ўтмаган. Корея ишлаб чиқарувчиси автомагнитолани етказиб беришни номаълум муддатга тўхтатганлиги ҳақида расмий хат билан «UzAuto Motors»га мурожаат қилган.

Шундан келиб чиқиб, «UzAuto Motors» компанияси автомобилларни етказиб бериш муддатининг узайиши, конвеерларнинг тўхтаб қолиши ҳамда ишчи ўринларнинг қисқаришини олдини олиш учун автомобилларни магнитоласиз ишлаб чиқаришни йўлга қўймоқчи.

Жорий йилнинг 19 январ кунидан аввал тузилган шартномалар бўйича «Chevrolet Lacetti» ва «Cobalt» автомобиллари «Humax» компанияси томонидан компонентларни етказиб беришдаги узилишлар сабабли, мижозларга магнитоласиз етказиб берилади.

«Харидорнинг розилиги билан амалга оширилувчи ушбу мажбурий чоранинг қўлланилиши юзлаб истеъмолчиларга узоқ кутилган автомобилларни яқин орада етказилишини таъминлайди», дейилади компания мурожаатида.

Ушбу вазиятдан чиқиш учун магнитоласиз автомобил харидорларига иккита вариант таклиф этилган:

  • Ишлаб чиқарувчи томонидан магнитола қурилмаси ҳамда унинг ўрнатилиш харажатларининг қопланиши билан яқин орада ўз автомобилини магнитоласиз олиш. Хоҳишингизга кўра, бозордан ўзингизга ёққан хоҳлаган турдаги автомагнитолани UzAuto Motors расмий дилерларида ўрнатиш билан автомобилга берилган кафолатни йўқотмайсиз.
  • Автомобилни кейинчалик текин қайта жиҳозлаш билан магнитоласиз олиб кетиш. Ишлаб чиқарувчи томонидан магнитола етказиб берилгандан сўнг, автомобилни қайта жиҳозлаш.

Эслатиб ўтамиз, яримўтказгичар можароси анча аввалроқ бошланганди. Ўшанда «UzAuto Motors» яримўтказгичларни баҳона қилиб, 4-позиция «Chevrolet Cobalt» машинасини ўриндиқ иситиш модулисиз сотишга уринганди.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг