Россия федерацияси молия вазири Антон Силуанов ва энергетика вазири Александр Новак жаҳон бозорида нефтнинг нархи бир баррел учун 30 долларга қадар тушиб кетишига тайёрланаётганини билдирди. Бунга ОПЕК+ бўйича келишувларнинг бекор қилиниши эҳтимоли сабаб бўлиши мумкин.

«Ёзда нималар бўлишини биз билмаймиз. ОПЕК+ нефт қазишни чеклаш бўйича келиша оладими ёки йўқ, билмаймиз. Агар келишувга эришилмаса, нарх бир баррел учун нафақат 40, балки 30 долларга қадар ҳам тушиб кетиши мумкин», — дейди ҳукумат раиси ўринбосари.

Шу билан биргаликда Силуанов нефт нархининг тушиши эҳтимоли ҳақида фикрларини билдириб ўтди.

«Бундай сценарий бўлиши эҳтимоли катта. Кўп нарса йилнинг иккинчи ярмида бозорда юзага келадиган вазият ва таклифга боғлиқ — ноаниқликлар, савдо уруши, санкциялар босими. Бугун нефтни кўп қазиб олиш хавфи бор, аммо вазиятни чуқурроқ таҳлил қилиш лозим», — дейди энергетика вазири.

Brent маркасига тегишли нефтнинг августдаги нархи бўйича душанба куни ўтказилган савдо натижасида бир баррел 63,29 долларга баҳоланган. WTI маркасидаги нефт эса 54,23 долларга савдо қилинган.

Россия иштирок этаётган ОПЕК+ келишуви 2019 йилнинг июнига қадар давом этиши кўзда тутилган. Жорий йилнинг декабр ойида нефт қазиб чиқаришни 1,2 миллион баррелга қадар чеклашга келишиб олинган эди. Аввалги келишувнинг самараси бор-йўғи ярим йил давом этган. Шундан сўнг нефт захираси ўсишда давом этди ва кейинчалик Америка нефтининг фаол кириб келиши натижасида бозорда ортиқча маҳсулот пайдо бўлди.