Исроил етакчи технологиялар институти профессори, «квазикристал»ларни кашф этгани боис, 2011 йилда кимё бўйича Нобель мукофоти лауреати бўлган Дан Шехтман Тошкентга ташриф буюргани ҳақида хабар бергандик.

Мартабали меҳмон билан IT-паркда ҳам учрашув бўлиб ўтди.

Учрашувда Исроил давлатининг Ўзбекистондаги фавқулодда ва мухтор элчиси Эдуард Шапира, IT-парк бош директори Фарҳод Ибрагимов, Инновацион ривожланиш вазирлиги вакиллари, шунингдек, IT-парк стартап жамоалари вакиллари иштирок этдилар.

Жаноб Эдуард Шапира Ўзбекистоннинг IT-соҳасини ривожлантириш учун ҳукумат томонидан катта эътибор кўрсатилаётгани, бунинг учун кўплаб хорижий мутахассислар жалб қилинаётганлиги ҳақида таъкидлаб ўтди ва ушбу ташрифдан кўзланган мақсад Ўзбекистон ва Исроил ўртасида илм-фан ва IT-соҳасида ўзаро ҳамкорликни кучайтириш эканини таъкидлади.

Ўз навбатида IT-парк вакиллари кўплаб хорижий тадбиркорларнинг Ўзбекистоннинг стартап-бозорига билдираётган қизиқишлари, жалб қилинган инвестициялар, хорижий ҳамкорлар билан биргаликда амалга оширилаётган лойиҳалар ҳақида гапириб беришди.

IT-паркнинг мақсадларидан бири маҳаллий IT-мутахассислар ва тадбиркорларни ўз фаолият доираларини маҳаллий бозордан халқаро бозорга қадар кенгайтиришлари учун қўллаб-қувватлаш ҳисобланади.

Профессор Дан Шехтман ўзининг фаолияти ва илмий ишланмаларини тижоратлаштириш йўллари тўғрисида батафсил сўзлаб берди, шунингдек, IT-парк вакилларини нетворкингни кенгайтириш учун ўтказиладиган IT-мусобақаларда иштирок этишга таклиф қилди.

IT-парк стартап-жамоалари профессор Дан Шехтманга ўз лойиҳаларини тақдим этиш ва қизиқтирган саволларини бериш имкониятига эга бўлдилар.