Хабарлар тезкор Телеграм каналимизда Обуна бўлиш ×

Коронавирус мутацияга учради: бири иккинчисидан зарарлироқ ва кўпроқ учрамоқда

Коронавирус мутацияга учради: бири иккинчисидан зарарлироқ ва кўпроқ учрамоқда

Фото: EPA / UPG

Хитойлик олимлар янги турдаги коронавирус (SARS-CoV-2)нинг икки кичик турини аниқлашди, бу ҳақда «Бэйцзин жибао» газетаси Хитой фанлар академиясига асосланиб хабар берди.

Тадқиқотчилар янги турдаги коронавируснинг 103 та намунасини ўрганишди, аниқланишича, кейинги пайтларда унинг 149 та мутацияси пайдо бўлган. Шунингдек, SARS-CoV-2 икки кичик турга бўлиниб ривожланган — S ва L турлари. Бу турларни олимлар 101 та намунада аниқлашди, шулардан 30 фоизи S турига, 70 фоизи L турига мансуб бўлган. Мутахассислар улардан иккинчиси (L тури) биринчиси (S тури)га нисбатан хавфлироқ деган хулосага келишди.

S турига мансуб коронавирус кўршапалакларда аниқланган вирусга кўпроқ мос келади. Яъни жўнроқ ифодалаганда бу коронавируснинг «эскирган» версияси.

Хитойнинг Ухань шаҳрида коронавирус тарқалишининг бошланғич палласида L тури тарқаган эди, аммо январь ойининг биринчи ҳафтасидан сўнг у камроқ учрай бошлади.

ХХР Гигиена ва соғлиқни сақлаш давлат қўмитаси коронавирус қўзғаган пневмониядан вафот этган беморларни ўрганиш натижаларини ҳам эълон қилди. Унда касаллик ўпка ҳужайраларини қандай ўзгартириши ҳақида маълум қилинган, таъкидланишича, касаллик талоқ ўлчамларини ҳам ўзгартириб, юрак мушакларини ишдан чиқаради. Хитойлик олимлар қўшимча қилишларича, одам ажратиш тизимлари маҳсулотларида ҳам коронавирус излари топилган. Бу уларнинг ҳаво-томчи йўли билан зарарланишда манба бўлиб хизмат қилишини англатади.

Бу яна шуни билдирадики, пневмонияни қўзғовчи вирус ўзаро суҳбатлашганда, йўталганда, аксирганда инсондан инсонга ўтади. Шунингдек, касаллик қўзғовчиси мавжуд бўлган жойдан кўтарилган чанг зарралари соғлом одамнинг нафас олиш тизимига кирган тақдирда ҳам касалликка сабаб бўлиши мумкин.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг