Исроилдаги COVID-19га қарши эмлаш ҳаракати етакчиси Хай Шаулян коронавирус туфайли оламдан ўтди. Бу ҳақда The Jerusalem Post хабар бермоқда.

У ижтимоий тармоқларда «Эпидемия йўқ — вакцина хавфли ва бефойда» деган жумлалар остида эмлашга қарши шиорларни тарқатганди. Шуалян вирусни юқтириб олганидан сўнг шифохонага ётқизилган ва кислородли аппаратга уланганди.

«Aгар аппаратни ечиб, уч метр юрсам, ҳушимдан кетаман. Қаттиқ йўталяпман, бўғилаётганимни ҳис қиляпман», — деган у.

Кейинчалик Шуалян Қуддус полицияси уни заҳарламоқчи бўлгани, шу боис унинг аҳволи кескин ёмонлашганини жар солганди. Ҳатто, унга бирор нима бўлса, қотилликка уриниш сифатида қаралиши мумкинлигидан огоҳлантирган.

8 август куни эмлашга қарши америкалик радио бошловчи Дик Фаррел COVID-19дан вафот этгани ва у ўлимидан олдин одамларни эмлашга чақиргани тўғрисида хабарлар тарқалди. Бунгача Дик AҚШ Демократлар партияси аъзолари ҳеч қачон вирус учун ижобий синов ўтказмаслигини даъво қилган, чунки бу вирус республикачиларни алдаш учун яратилган уйдирма эканлигини таъкидлаганди.