Хабарлар тезкор Телеграм каналимизда Обуна бўлиш ×

Ахборот уруши ва хуружлари, шубҳали инвестициялар хусусида (видео)

Бугун инсоният ноодатий уруш билан юзма юз келди.  Урушки, ҳеч қандай ўқсиз, танкларсиз, қуролсиз… аммо қурбонларсиз эмас. Бу урушнинг номи информацион уруш деб номланади. Мен информацион урушни вирусга ўхшатаман. Ўқ ташқаридан ёриб кириб сизга жароҳат етказиши мумкин, аммо вирус ичкаридан емиради.

Бугун дунё саҳнида юз бераётган жараёнларни таҳлил қилиб кўрадиган бўлсак, мазлум ва золим ўртасидаги фарқни адолат эмас, ОАВда, интернет тармоғида ким, қандай йўл билан фойдалана олаётгани билан белгилаб бермоқда.

Бугун Ўзбекистон ривожланаётган давлат сифатида яхшиси баробарида информацион хуружларга ҳам учрамоқда. Давлатлар ўртасидаги чегаралар муҳим аҳамият касб этмай бораётган бир пайтда, Марказий Осиёда, Афғонистондек нотинч давлат жойлашган минтақада ахборот уруши тобора кучайиб бормоқда. Шу билан бирга, халқимиз, жамиятимиз янги йўлга, янги ислоҳотларга қадам қўяётган вақтда, бу ўзгаришларни холис, ижобий тарзда ёритиш билан бирга, халқни руҳини синдириш, тўғри йўлдан адаштиришга уринаётганлар ҳам учраб турибди.

Битта мисол келтираман: яқинда Давлат хавфсизлик хизмати раиси Ихтиёр Абдуллаевнинг Сенатда Ўзбекистонга таҳдид солаётган хавфлар ҳақида сўзлаган нутқи қаттиқ танқид остига олинди. Турли ижтимоий тармоқларда информацион хуружлар уюштирилди. Масалан, салафийлик, унинг зарарлари, шубҳали инвестициялар тўғрисидаги гаплар айниқса нишонга олинди.

Хўш, мулоҳаза қилайлик, шубҳали инвестиция нима? Маълумки, жаҳон банк тизимида ҳисобга олинмаган пуллар жуда кўп. Уларни ноқонуний йўл билан бошқаларнинг  ҳисобидан ечиб олиб, бошқа давлатларга инвестиция сифатида йўналтириб, нақдлаштириб оладилар. Мазкур маблағ кейин террористик ташкилотларни молиялаштиришга кетади. Ман сизга шубҳали инвеститициянинг натижаси.

Салафийлик масаласига келсак, мазкур тушунчанинг ислом дини аҳкомларига зид эканини барча билади. Аммо кўриб турганимиздек, бу аччиқ ҳақиқатлар давлатимизнинг, юртимизнинг тинчлигини истамайдиган кучлар томонидан ўзимизга қарши ишлатилмоқда.

Кўпчилик оддий одамлар, шунингдек, жамиятнинг зиёли қатлами билан учрашганда, уларда баъзан иккиланиш кайфиятини сезаяпман. Дунёда иккиланишдан ортиқроқ зарар, иккиланишдан оғирроқ азоб йўқ. Улар мақсадга эришишда озгина машаққат ва изтироб ўтиш кераклигидан иккиланишмоқда. Бугун бўлаётган информацион хуружларнинг  ҳам асосий мақсади халқни эртанги кунга бўлган ишончини синдиришдир. Бу жараёнда иккиланишлар аянчли натижаларга олиб келиши мумкин.

Масалан, бир журналистимиз инновацион соҳада олиб борилаётган ишлар хусусида фикр юритар экан, унинг келажаги ҳақида иккиланиш билан гапирди. Хўш, нега иккиланиш керак? Яхши ният билан бошланган эзгу ишга маҳкам бел боғлаб киришса бўлади-ку. Демак, жамият аъзоларининг тафаккури ўзгармас экан, ҳар қандай олиб борилаётган кучли сиёсат натижа бериши қийин. Чунки унинг моҳиятини ҳар бир шахс англаб етиши керак.  Биз инновацияни ривожлантиришга бел боғладикми, аввало, инновацион ғояларнинг нақадар жамият учун зарурлигини англаб етишимиз керак.

Иккиланаётганлар хусусида бир ҳикоя бор: ўрмонга ўт кетибди. Ҳамма имкон даражасида ўтни ўчиришга тушибди. Шунда дарахт устида бамайлихотир ўтирган қарға сув ташиётган чумолига: «Эй чумоли, сен ташиган бир томчи сув нима бўларди?» деганда, чумоли: «Менинг-ку тарафим маълум, сенинг тарафинг номаълум» деган экан.

Бугун ўзбек жамиятининг тафаккур модернизациясига муҳтож. Ҳар қандай ўз ишининг устаси бўлган киши уни жон-дилдан ёндошиб бажармоғи керак. Ўқитувчи сифатли таълим бериши, ўқувчилар сифатли таълим олиши ва ҳоказолар. Агар биз ўқитувчиларга етарли шароитларни яратиб бермасак, уларни ишга, пахта теришга оли чиқсак, буюк келажак ҳақида орзу қилмасак ҳам бўлаверади.

Ушбу фикрларнинг давоми юқоридаги видеодан ўрин олган.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг