Канаданинг Виктория шаҳрида яшовчи пенсионер аёл етти ой пенсия олмаган. Чунки уни янглишиб ўлдига чиқаришган. Бу ҳақда «Vancouver is awesome» сайти хабар берди.

20 апрель куни 80 ёшли Вильма Уильямс эрталабки мактубни ўқишга киришди. Канада солиқ агентлиги унга ўлганлиги ҳақида мактуб йўллабди!!!

Аёл сабабини аниқлаш учун агентликка қўнғироқ қилди. Табиийки, у ерга тушиш осон бўлмаган. Негаки, коронавирус туфайли фуқароларга молиявий ёрдам айнан агентлик орқали тарқатилади. Шу боис телефонлар тинмайди. Икки-уч соатлик уринишлардан сўнг Уильямс, ниҳоят, агентлик ходими билан боғланишга муваффақ бўлди. Мутахассис масалага ойдинлик киритишга ваъда берди.

Маълум бўлишича, Канада солиқ агентлиги бу хабарни пенсия жамғармасидан олган. Пенсия жамғармасига эса сентябрда дафн агентлигидан қўнғироқ қилишиб, Уильямс вафот этганлигини хабар беришган. Шундан сўнг нафақа бериш тўхтатилган.

Тахминларга кўра, пенсионерни бошқа бир адаши билан алмаштириб қўйишган. Уильямс пенсия олмаётганини дарров пайқамаган. Чунки бир неча ойдан бери банкдаги ҳисобини ҳатто текшириб ҳам кўрмаган.

Уильямс вазиятга кулиб қўя қолган. Лекин бу хатни таъсирчан ва кексароқ бошқа аёл олганида инсульт бўлиб қолиши мумкин эди, деган у ташвишланиб.