Мамлакатимизда коронавирус инфекциясига чалинганлар сони бўйича кунлик рекорд янгиланди.

Кеча тунда коронавирус аниқланганлар сони 342 нафарга етгани хабар қилинганди. 6 апрел тунги соат 23:35да берилган эълонга кўра эса Ўзбекистонда коронавирус инфекцияси аниқланган ҳолатлар сони 457 нафарни ташкил этмоқда. Бир кунлик ўсиш – 115!

Бунга қадар энг юқори кунлик ўсиш 5 апрел куни қайд этилган эди – 76 нафар.

Эслатиб ўтамиз, Соғлиқни сақлаш вазири Алишер Шодмонов Ўзбекистонда коронавирус тарқалиши бўйича батафсил маълумот берганди.

«Энг ёмони — тўрт нафар беморимиз ким билан учрашганини сир сақлаган. Фақатгина улар билан мулоқотда бўлганларда иситма чиққандан кейин биз буни биляпмиз», дея таъкидлаганди вазир.

У, шунингдек, беморлар орасида касаллик аниқлангандан сўнг ҳам шифокорларга қулоқ солмасдан, ўз билганини қилиб юрганлар учраб туриганини афсус билан қайд этади.

Вазирнинг хулосаси шундай: Қачонки интизом бўлса, барча тартиб-қоидага бўйсуниб, икки ҳафта уйимизда ўтирсак, ҳаммаси ўтиб кетади. Шунда биринчи навбатда оила аъзоларимизни сақлаб қолган бўламиз...