Коронавирусдан зарарланиш нега мамлакатларда ҳар хил? Аргентиналик олимларнинг фикрича, бу на коронавирус штамми, на миллатнинг иммунитетига боғлиқ — ҳамма гап супертарқатувчиларда. Улар кимлар?

Аргентинадаги Литорал миллий университети тадқиқотчиси Пабло Белдоменико турли мамлакатларда коронавирус билан касалланиш ҳолатларини таҳлил қилди. Унинг фикрича, касалликни юқтирган ўртамиёна беморлардан фарқли ўлароқ, супертарқатувчилар бу — SARS-CoV2 вирусини ташувчилардир.

Аксарият мамлакатларда, масалан, қўшни мамлакатларда касаллик тарқалиши ва ўлим ҳолатларидаги бир неча карралик тафовутлар сабаби шунда, дейди олим. Бевосита SARS-CoV-2ни тарқатаётганлар орасида симптомсиз (касаллик аломатларисиз) тарқатувчилар айрим ҳолларда супертарқатувчиларга айланаётганини ҳам олим инкор этмаган.

Белдомениконинг фикрича, инсон организмига, юқтириб олишдан ташқари, вирус қанча миқдорда (вирус юкламаси) келиб тушишини ҳам инобатга олиш керак.

Катта вирус юкламасини олган инсоннинг ўзи ҳам супертарқатувчига айланиши мумкин, дейди Россия ФА Физик кимё ва электрокимё институти илмий ишлар бўйича директор ўринбосари Олег Батишчев.

«Вирус инсоннинг ўзини эмас, балки унинг ҳужайраларини зарарлайди. Организмга тушган битта вирус битта ҳужайрани зарарлаб, дейлик, 100 та янги вирусни пайдо қилади. Агарда организмга 100 та вирус тушса, у ҳолда бир инсон танасида 10 мингта янги вирус дунёга келади. Бу ерда гап коронавируснинг хусусиятида эмас, бу оддий арифметика. Шундай экан, вирус юкламасини (кўп сонли вирусларни) олган инсон супертарқатувчига айланиши мумкин», — тушунтиради эксперт.

Курск давлат тиббиёт университети экспериментал жарроҳлик ва онкология лабораторияси ходими Давид Наимзоданинг фикрича, супертарқатувчилар мавжудлиги эҳтимоли жуда юқори.