Буюк Британияда аҳоли сони кўплиги бўйича иккинчи ўринда турадиган Бирмингем шаҳридаги шифокор мамлакатда янги коронавирус инфекциясининг тўртта тўлқини кузатилишини тахмин қилмоқда. Унинг сўзларини «Birmingham Live» нашри чоп этди.

Шаҳардаги етакчи шифокорлардан бири Шаби Аҳмад Буюк Британия аҳолиси «вирус билан бирга яшашни ўрганишига» тўғри келишини, негаки, унга қарши вакцина ҳали яратилмаганини айтиб ўтган.

Ҳукумат COVID-19 нинг биринчи тўлқини тугашига яқин қолаётганини эълон қилган бир пайтда доктор бунга қўшилмайди.

«Ҳали иккинчи, учинчи ва тўртинчи тўлқинлар бўлади. Вирус шунчаки кетмайди. У турли йўллар билан тарқалишда давом этаверади. Биз шунчаки ундан ҳимояланишни ўрганиб олишимиз керак», — деди Аҳмад.

Унинг таъкидлашича, коронавирусни юқтирган ва бошқаларга қараганда оғирроқ ўтказган беморларнинг аксарияти қора танли, осиёлик ёки этник озчиликни ташкил этади. Аҳмаднинг сўзларига кўра, COVID-19 туфайли вафот этган 40 та шифокордан 38 нафари Африка ва Осиё миллатига ёки этник озчиликка киради. Шунингдек, вафот этган тиббиёт ходимлари, ижтимоий ҳимоя ходимлари ва қариялар уйи ходимларининг 80 фоизи ҳам уларга тегишли.

Мамлакат аҳолиси аллақачон кўчага чиқиши ва жамоат жойларига бориши мумкин, лекин ижтимоий масофани сақлаши зарур, деди доктор.

Аҳмад жиддий касаллиги бўла туриб, янги коронавирус инфекциясини юқтириб қўйишдан қўрқиб, шифокорга боришни пайсалга солиб юрган беморлардан кўпроқ хавотирда. Шифокор онкологик ва бошқа оғир касаллиги бўлган беморларни тиббиёт ходимларига мурожаат қилишга чақирди.

Маълумотларга кўра, 5 июль ҳолатига кўра дунёда 11,4 миллион кишида янги коронавирус инфекцияси қайд этилди. COVID-19 туфайли 534,2 минг киши ҳаётдан кўз юмди, 6,5 миллион бемор тузалди. Буюк Британияда 284,9 минг киши касалликка чалинган бўлиб, улардан 44,2 минг нафари вафот этди.

Янги коронавирус инфекцияси беморнинг оғзи ёки бурнидан ажралиб, атрофдаги буюмларга ўрнашиб қоладиган майда томчилар орқали юқади. ЖССТ бошқа одамлардан бир метрдан ортиқ масофа сақлашни, қўлларни тез-тез ювишни ёки зарарсизлантиришни, оғиз, бурун ва кўзларни ушламасликни тавсия этади. Одамлар кўп тўпланадиган жойларда ва жамоат транспортида ниқобдан фойдаланиш зарур.