Санитария-эпидемиология назорати давлат инспекцияси бошлиғи Нурмат Отабеков иштирокида брифинг ўтказилгани хабар берилганди.

Унда «Бухорода нималар бўлмоқда? Нега вирус юқтирганлар сони бирданига 19 тадан 84 нафарга ошиб кетди?» деган савол берилди. Мазкур ҳолатга Н.Отабеков қуйидагича изоҳ берди. Бу ҳақда ЎзА хабар берди.

«Бухорога 3 та давлатдан ҳамюртларимиз олиб келинган. Дастлаб Корея давлатидан 239 нафар фуқаромиз олиб келинган. Мазкур 239 нафар фуқаро Туркиядаги Истанбул аэропортида 8 соат битта хонада ҳеч қанақа ҳимоя воситаларисиз қолиб кетган. Демак, улар ўзларининг ҳимоясини эсдан чиқариб қўйган. Натижада келганидан сўнг, дастлабки текширувларда уларнинг 66 нафарида коронавирус касаллиги аниқланган. Касалликни юқиб қолишига уларнинг ўзлари шарт-шароит қилган.

Бундан ташқари Бухоро вилоятига яна Россия Федерациясидан иккита рейсда 530 нафар фуқаро олиб келинган. Улар орасида ҳам коронавирус касаллигига чалинганлар бор. Россия Федерациясидан олиб келинганларга эътибор берадиган бўлсак, улар 2 кундан 5 кунгача ҳеч қандай ҳимоя воситаларисиз, бемалол бир-бири билан мулоқот қилиб, битта жойда яшашган.

Демак, улар ўзларининг ҳимояси ҳақида ўйламагани, эпидемик нохуш ҳудудда эканини англаб етмагани мана шу ҳолатни юзага келишига сабаб бўлган.

Албатта, бу одамлар орасида коронавирус касаллигига чалинганларини аниқлаяпмиз».

Аввалроқ, Тошкент шаҳар ҳокимлигида вирус тарқагани бўйича миш-мишларга изоҳ берилган эди.